سنجے جھا جے ڈی یو کے کارگزار قومی صدر مقرر، وزیر اعلیٰ نتیش کمار نے کیا اعلان

نئی دہلی: جنتا دل یونائیٹڈ (جے ڈی یو) کی قومی ایگزیکٹو میٹنگ دہلی میں منعقد ہوئی، جس کی صدارت پارٹی کے سربراہ اور بہار کے وزیر اعلیٰ نتیش کمار نے کی۔ اس میٹنگ میں جے ڈی یو کے سینئر لیڈر سنجے جھا کو پارٹی کا کارگزار قومی صدر بنانے کا فیصلہ کیا گیا ہے۔

رپورٹ کے مطابق وزیر اعلیٰ اور جے ڈی یو سربراہ نتیش کمار نے خود سنجے جھا کو کارگزار صدر بنانے کا اعلان کیا۔ نتیش کمار نے یہ فیصلہ دہلی کے کانسٹی ٹیوشن کلب میں منعقدہ پارٹی کی قومی ایگزیکٹو میٹنگ میں لیا۔ اس میٹنگ میں پارٹی کے سینئر لیڈران نے کئی اہم امور پر بات چیت کی۔

اس میٹنگ میں تنظیم سے متعلق ایک قرارداد منظور کی گئی، جس میں کہا گیا کہ نتیش کمار کی قیادت میں نیشنل ایگزیکیوٹیو اعتماد کا اظہار کرے گی اور اور جے ڈی یو نے 2025 میں آئندہ بہار اسمبلی انتخابات نتیش کمار کی قیادت میں لڑنے کا بھی عہد لیا۔ نیز، جنتا دل یونائیٹڈ نے 2024 کے جھارکھنڈ انتخابات میں اپنے امیدوار کھڑے کرنے اور مضبوطی سے الیکشن لڑنے کا فیصلہ کیا۔ تنظیم سے متعلق تجویز میں مرکزی اور ریاستی حکومتوں میں پارٹی وزراء سے کہا گیا ہے کہ وہ کارکنوں کے ساتھ رابطہ برقرار رکھیں۔

پارٹی کی قرار داد میں یہ ہدایت بھی دی گئی ہے کہ جہاں کہیں بھی وزرا کا پروگرام ہو، بوتھ لیول کے کارکنوں کو اس کی خبر ہونی چاہئے۔ نیشنل ایگزیکیوٹیو نے پارٹی کو بوتھ سطح پر مضبوط کرنے کا عزم کیا ہے۔

نیشنل ایگزیکیوٹیو میٹنگ میں جنتا دل یونائیٹڈ نے ایک سیاسی قرارداد بھی پاس کی جس میں نتیش کمار کو لوک سبھا انتخابات میں پارٹی کی جیت پر مبارکباد دی گئی۔ ساتھ ہی وزیر اعظم نریندر مودی کو این ڈی اے کی جیت پر مبارکباد دی گئی۔

سیاسی قرارداد میں نتیش کمار کی پارٹی نے ایک بار پھر بہار کو خصوصی ریاست کا درجہ دینے یا خصوصی پیکیج دینے کے پرانے مطالبے کو دہرایا ہے۔ جے ڈی یو کی نیشنل ایگزیکیوٹیو نے بہار میں کاسٹ سروے رپورٹ کی بنیاد پر ریزرویشن کا دائرہ بڑھانے کے فیصلے کو درست قرار دیا اور پٹنہ ہائی کورٹ کی طرف سے مسترد کیے جانے کے باوجود اسے نویں شیڈول میں شامل کرنے کا مطالبہ کیا۔