بھائی چارے کی عمدہ مثال، جعفرآباد میں کانوڑ کیمپ کا دہلی کانگریس صدر کے ہاتھوں افتتاح

جعفر آباد میں ویلکم پلیا کی بغل میں لگنے والے سدبھاؤنا کانوڑ کیمپ کا افتتاح آج دہلی پر دیش کانگریس کے صدر دیوندر یادو کے ہاتھوں ہوا۔ اس موقع پر دہلی کانگریس کے صدر نے نفرت کی سیاست کرنے والوں پرسخت تنقید کی اور اس کانوڑ کیمپ کو بھائی چارے کی ایک عمدہ مثال قرار دیا۔ یہ کانوڑ کیمپ سیلم پور اسمبلی حلقہ کے سابق رکن اسمبلی اور کانگریس کے قد آور لیڈر چودھری متین احمد کی سر پرستی میں گذشتہ 30 برسوں سے مسلسل ساون کے مہینے لگتا ہے۔

اس موقع پر دہلی کانگریس صدر دیوندر یادو نے کہا کہ آج کے دور میں کچھ لوگ نفرت کی سیاست کرکے ہمارے برسوں پرانے ہندو مسلم بھائی چارے کو ختم کرنا چاہتے ہیں۔ مگر وہ لوگ نہیں جانتے یہ ملک آپسی بھائی چارے اور ایک دوسرے کے تعاون سے ہی ترقی کرے گا۔ انہوں نے کہا کہ متین احمد دہلی کانگریس کے سینئر لیڈر ہونے کے ساتھ ہی ہند و مسلم اتحاد کی پہچان بھی ہیں اور گزشتہ تقریبا 30سالوں سے شیو بھکتوں کے لیے کیمپ لگا کر ان کی خدمت کرتے آرہے ہیں۔ دیوندر یادو نے کہا کہ جعفرآباد کے اس سدبھاؤنا کیمپ سے ان لوگوں کو سبق لینا چاہئے جو ہر وقت نفرت پھیلانے کی باتیں سوچتے رہتے ہیں۔

سابق رکن اسمبلی چودھری متین احمد نے اپنے خطاب میں کہا کہ ہم نے کبھی بھی اپنے علاقے میں نفرت نہیں بڑھنے دی اور یہی وجہ ہے کہ یہاں کے لوگ ہر تہوار ایک دوسرے کے ساتھ مل کر اور ایک دوسرے کی عقیدت کا خیال رکھتے ہوئے مناتے ہیں۔ انہوں نے کہا کہ جہاں نفرت پروان چڑھتی ہے وہاں سبھی کا نقصان ہوتا ہے اور کانگریس کی روایت رہی ہے کہ سب کو ایک ساتھ لے کر چلا جائے، اسی نظریہ کے تحت ہم کام کر رہے ہیں۔ چودھری متین احمد نے بتایا کہ اس سدبھاؤنا کانوڑ کیمپ کا افتتاح مسلسل 15 سالوں تک دہلی کی سابق وزیر اعلیٰ آنجہانی شیلا دکشت نے خود اپنے ہاتھوں سے کیا ہے۔ آج وہ بھلے ہی اس دنیا میں نہیں ہیں لیکن ان کی یادیں اور ان کے دیئے ہوئے مشورے پر ہم آج بھی عمل پیرا ہیں اور آگے بھی رہیں گے۔

بابر پور ضلع کانگریس کمیٹی کے صدر چودھری زبیر احمد نے کہا کہ اس کانوڑ کیمپ میں تمام طبقات کے لوگوں کی شمولیت اس بات کی شہادت ہے کہ وہ فرقہ پرستوں سے گھبرانے والے نہیں ہیں اور ہندو مسلم اتحاد اور آپسی بھائی چارہ کی جڑوں کو نقصان نہیں پہنچنے دیں گے۔ انہوں نے کہا کہ ہمارے ضلع بابر پور میں شیو بھکتوں کا پھولوں سے استقبال کیا جاتا ہے اور بھائی چارے کی مثال کو عام کیا جاتا ہے۔

اس تقریب کے مہمان سید ناصر جاوید نے کہا کہ جہاں ایک جانب ملک بھر میں نفرت پھیلانے کی کوششیں کی جا رہی ہے وہیں دوسری طرف ہمارے لیڈر راہل گاندھی ہر جگہ محبت کی دکان کھول رہے ہیں۔ جعفرآباد کا سد بھاؤنا کانوڑ کیمپ اسی محبت کی دکان کا ایک حصہ ہے، جس کو سابق رکن اسمبلی چودھری متین احمد گزشتہ 30برسوں سے منعقد کرتے آرہے ہیں۔ وہ خود اس کیمپ میں روزانہ بیٹھتے ہیں اور شیو بھکتوں کی خدمت میں پیش پیش رہتے ہیں۔

اس تقریب کی صدارت بابر پور ضلع کانگریس کمیٹی کے صدر چودھری زبیر احمد نے کی جبکہ نظامت دہلی پردیش کانگریس کمیٹی کے مہمان سید ناصر جاوید نے کی۔