پیرس اولمپک 2024: لکشیہ سین کو کارڈن کے خلاف ملی جیت شمار سے باہر، ساتوِک-چراغ کا میچ رَد

ہندوستان کے اسٹار بیڈمنٹن کھلاڑی لکشیہ سین کی اولمپک کھیلوں میں مینس سنگلز گروپ ایل کے شروعاتی میچ میں کیون کارڈن پر ملی جیت کو اب شمار نہیں کیا جائے گا۔ ایسا اس لیے کیونکہ گوانٹے مالا کے ان کے حریف کارڈن بائیں کوہنی کی چوٹ کے سبب پیرس اولمپک سے باہر ہو گئے ہیں۔ عالمی بیڈمنٹن ایسو سی ایشن (بی ڈبلیو ایف) نے ایک اَپڈیٹ میں کہا کہ ’’گوانٹے مالا کے مینس سنگلز کھلاڑی کیون کارڈن بائیں کوہنی کی چوٹ کے سبب پیرس 2024 اولمپک کھیلوں کے بیڈمنٹن مقابلے سے ہٹ گئے ہیں۔‘‘

مزید جانکاری دیتے ہوئے ایسو سی ایشن نے بتایا کہ ’’انڈونیشیا کے جوناتھن کرسٹی اور بلجیم کے جولین کیراگی کے خلاف ان کے گروپ ایل کے باقی میچ اب نہیں کھیلے جائیں گے۔ اس گروپ کے میچوں کا پروگرام پھر سے طے کیا گیا ہے۔‘‘ بی ڈبلیو ایف کا کہنا ہے کہ ’’گروپ مرحلہ کے لیے بی ڈبلیو ایف کے مقابلہ سے متعلق اصولوں کے مطابق گروپ ایل میں میچ کارڈن کو شامل کرتے ہوئے کھیلے گئے تھے۔ اس لیے گروپ ایل میں کارڈن سے جڑے سبھی کھیلے گئے یا ابھی کھیلے جانے والے میچوں کے ریزلٹ اب ہٹائے گئے مانے جاتے ہیں۔‘‘

کارڈن کے پیرس اولمپک سے ہٹنے کا مطلب یہ ہوا کہ اب گروپ ایل میں صرف تین کھلاڑی ہوں گے جس میں لکشیہ سین کے علاوہ کرسٹی اور کیراگی شامل ہیں۔ اس طرح سے اس گروپ میں لکشیہ سین تنہا کھلاڑی ہوں گے جو تین میچ کھیلیں گے۔ یہ ہندوستانی کھلاڑی پیر کے روز کیراگی اور بدھ کے روز اپنے آخری گروپ میچ میں کرسٹی سے مقابلہ کرے گا۔

دوسری طرف جرمن کھلاڑی مارک لیمفس نے چوٹ کی وجہ سے اپنا نام واپس لے لیا ہے۔ اس وجہ سے ساتوِک سراج رنکی ریڈی اور چراغ شیٹی کا مینس ڈبلز گروپ سی کا مقابلہ رد کر دیا گیا ہے۔ ہندوستانی جوڑی کو پیر کے روز لیمفس اور ماروِن سیڈیل کی جرمن جوڑی سے میچ کھیلنا تھا۔ بی ڈبلیو ایف کا کہنا ہے کہ ’’جرمن مینس ڈبلز کھلاڑی مارک لیمفس گھٹنے کی چوٹ کے سبب پیرس اولمپک کھیلوں کے بیڈمنٹن مقابلے سے ہٹ گئے ہیں۔‘‘ اس نے مزید کہا کہ ’’لیمفس اور ان کے ساتھی ماروِن سیڈیل کے گروپ سی میں ہندوستانی کھلاڑی ساتوِک اور چراغ (مقامی وقت کے مطابق صبح 8.30 بجے، 29 جولائی 2024) اور فرانس کے لوکاس کوروی اور رونن لابر (30 جولائی 2024) کے خلاف ہونے والے میچ اب نہیں کھیلے جائیں گے۔‘‘

واضح رہے کہ ساتوِک اور چراغ نے ہفتہ کے روز لوکاس کوروی اور رونن لابار کی فرانسیسی جوڑی پر 17-21، 14-21 سے جیت کے ساتھ اپنی مہم شروع کی تھی۔ یہ ہندوستانی جوڑی گروپ کے اپنے آخری میچ میں منگل کو انڈونیشیا کے فجر الفیان اور محمد ریان اردیانتو سے مقابلہ کرے گی۔ جرمن جوڑی کے ہٹنے کے بعد انڈونیشیا کی جوڑی نے ہفتہ کو لیمفس اور سیڈیل پر جیت درج کی تھی، اس ریزلٹ کو اب شمار نہیں کیا جائے گا۔