غزہ پر اسرائیلی حملے کے نتیجے میں اقوام متحدہ کا ہندوستانی ملازم جان بحق، سکریٹری جنرل انٹونیو گوٹریس کا اظہار افسوس
اقوام متحدہ کے سکریٹری جنرل انٹونیو گوٹریس نے اقوام متحدہ کے محکمہ تحفظ و سلامتی (ڈی ایس ایس) کے ایک ملازم کی موت اور ڈی ایس ایس کے دوسرے ملازم کے زخمی ہونے پر اپنے گہرے افسوس کا اظہار کیا
![<div class="paragraphs"><p>تصویر آئی اے این ایس</p></div>](https://media.assettype.com/qaumiawaz%2F2024-05%2F144a782d-a4ae-46e5-ba30-e7f37c70a2c1%2Fgaza_war.jpg?rect=0%2C0%2C4088%2C2300&auto=format%2Ccompress&fmt=webp)
تصویر آئی اے این ایس
غزہ: اسرائیل اور حماس کے درمیان جاری جنگ کے دوران اقوام متحدہ کے لیے کام کرنے والا ایک ہندوستانی کارکن غزہ کے شہر رفح میں حملے کی زد میں آ کر جان بحق ہو گیا۔ رپورٹ کے مطابق، 7 اکتوبر کو اسرائیل اور حماس کے درمیان تنازع شروع ہونے کے بعد یہ اقوام متحدہ کے کسی بین الاقوامی ملازم کی ہلاکت کا پہلا واقعہ ہے۔
جان گنوانے والا شخص اقوام متحدہ کے محکمہ دفاع اور سلامتی (ڈی ایس ایس) کا ملازم تھا اور تاحال اس کی شناخت ظاہر نہیں کی گئی ہے۔ ذرائع نے خبر رساں ایجنسی پی ٹی آئی کو تصدیق کی کہ وہ ایک ہندوستانی تھا اور ہندوستانی فوج کا سابق فوجی تھا۔
ڈی ایس ایس کا ایک اور ملازم رفح میں اقوام متحدہ کی گاڑی میں یورپی ہسپتال جاتے ہوئے پیش آنے والے واقعے میں زخمی ہو گیا۔ اقوام متحدہ کے سیکرٹری جنرل انٹونیو گوٹریس نے اقوام متحدہ کے محکمہ تحفظ اور سلامتی (ڈی ایس ایس) کے ایک ملازم کی موت اور ڈی ایس ایس کے دوسرے ملازم کے زخمی ہونے پر اپنے گہرے دکھ کا اظہار کیا۔
سیکرٹری جنرل کے نائب ترجمان فرحان حق کی جانب سے جاری کردہ ایک بیان میں کہا گیا ہے کہ گوٹیریس نے اقوام متحدہ کے اہلکاروں پر ہونے والے تمام حملوں کی مذمت کی اور مکمل تحقیقات کا مطالبہ کیا۔ گوٹریس نے اپنی جان سے ہاتھ دھونے والے ملازم کے اہل خانہ سے تعزیت کا اظہار کیا۔
بیان میں کہا گیا، ’’غزہ میں تنازعہ نہ صرف عام شہریوں پر بلکہ انسانی امداد کے کارکنوں پر بھی بہت زیادہ اثر ڈال رہا ہے۔ سیکرٹری جنرل نے ایک بار پھر فوری طور پر انسانی بنیادوں پر جنگ بندی اور تمام یرغمالیوں کی رہائی کا مطالبہ کیا ہے۔‘‘
گوٹریس نے 'ایکس' پر ایک پوسٹ میں کہا کہ غزہ میں اقوام متحدہ کی گاڑی پر حملہ ہوا، ہمارا ایک ساتھی ہلاک اور دوسرا زخمی ہوا۔ انہوں نے کہا کہ غزہ میں اقوام متحدہ کے 190 سے زائد ملازمین ہلاک ہو چکے ہیں۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔