اوم برلا پھر لوک سبھا کے اسپیکر منتخب، صوتی ووٹوں سے لیا گیا فیصلہ، مودی-راہل نے پیش کی مبارکباد
18ویں لوک سبھا کے پہلے اجلاس کے دوران آج نئے لوک سبھا اسپیکر کا انتخاب ہو گیا ہے۔ اوم برلا کو دوبارہ لوک سبھا کا اسپیکر منتخب کیا گیا ہے۔ وہ صوتی ووٹ سے لوک سبھا کے اسپیکر منتخب ہوئے
![<div class="paragraphs"><p>لوک سبھا اسپیکر اوم برلا / آئی اے این ایس</p></div>](https://media.assettype.com/qaumiawaz%2F2023-09%2Fcd4fb9ec-448d-48ed-a830-181a0b080f96%2Fom_birla.jpg?rect=0%2C25%2C4000%2C2250&auto=format%2Ccompress&fmt=webp)
لوک سبھا اسپیکر اوم برلا / آئی اے این ایس
اوم برلا ایک بار پھر لوک سبھا کے اسپیکر بن گئے ہیں۔ ایوان میں بدھ کو انہیں صوتی ووٹ کے ذریعے اسپیکر منتخب کیا گیا۔ برلا کے لوک سبھا کے اسپیکر منتخب ہونے کے بعد روایت کے مطابق وزیر اعظم نریندر مودی اور اپوزیشن لیڈر راہل گاندھی نے انہیں کرسی تک پہنچایا۔ وزیر اعظم نریندر مودی اور لوک سبھا میں قائد حزب اختلاف راہل گاندھی نے اسپیکر کا عہدہ سنبھالنے کے بعد اوم برلا کو مبارک باد پیش کی۔
رپورٹ کے مطابق بدھ کی صبح 11 بجے جب لوک سبھا کی کارروائی شروع ہوئی تو حلف لینے کے لیے سب سے پہلے ان 9 منتخب ارکان پارلیمنٹ کے نام پکارے گئے جنہوں نے ابھی تک پارلیمنٹ کی رکنیت کا حلف نہیں لیا تھا۔ اس کے بعد ایوان کے پروٹیم اسپیکر بھرتری ہری مہتاب نے ایوان کو بتایا کہ انہیں لوک سبھا اسپیکر کے انتخاب سے متعلق 16 نوٹس موصول ہوئے ہیں۔ انہوں نے تجویز پیش کرنے کے لیے سب سے پہلے پی ایم مودی کا نام لیا۔ اس کے بعد وزیر اعظم نریندر مودی نے ایوان میں لوک سبھا کے نئے اسپیکر کے طور پر اوم برلا کا نام تجویز کیا جس کی وزیر دفاع راج ناتھ سنگھ نے حمایت کی۔
اس کے بعد جے ڈی یو لیڈر اور مرکزی وزیر راجیو رنجن سنگھ عرف لالن سنگھ نے لوک سبھا کے اسپیکر کے لیے اوم برلا کا نام تجویز کیا، جس کی آر ایل ڈی کے رکن پارلیمنٹ راج کمار سانگوان نے حمایت کی۔ ہندوستانی عوام مورچہ کے رہنما اور مرکزی وزیر جیتن رام مانجھی نے لوک سبھا اسپیکر کے لیے اوم برلا کا نام تجویز کیا، جس کی مرکزی وزیر شیوراج سنگھ چوہان نے حمایت کی۔
یہ بھی پڑھیں : لوک سبھا میں اپوزیشن لیڈر راہل گاندھی کو ملیں گے یہ حقوق
اس کے بعد مرکزی وزیر داخلہ امت شاہ نے اوم برلا کا نام تجویز کیا جس کی مرکزی وزیر نتن گڈکری نے تائید کی۔ این ڈی اے میں شامل دیگر اتحادی جماعتوں کی جانب سے شیوسینا لیڈر اور مرکزی وزیر پرتاپ راؤ گنپت راؤ جادھو، لوک جن شکتی پارٹی (رام ولاس) کے سربراہ اور مرکزی وزیر چراغ پاسوان، جے ڈی ایس لیڈر اور مرکزی وزیر ایچ ڈی کمار سوامی، ٹی ڈی پی لیڈر اور مرکزی وزیر کے رام موہن نائیڈو، اپنا دل (ایس) لیڈر اور مرکزی وزیر انوپریہ پٹیل اور کئی دوسرے لیڈروں نے لوک سبھا اسپیکر کے عہدہ کے لیے ایوان میں اوم برلا کا نام تجویز کیا اور این ڈی اے کے کئی دیگر رہنماؤں نے اس کی حمایت کی۔
دوسری طرف، اپوزیشن اتحاد سے شیو سینا (ادھو ٹھاکرے دھڑے) کے ایم پی اروند ساونت نے لوک سبھا اسپیکر کے عہدے کے لیے کو نامزد کیا ہے۔ ایوان میں سریش کے نام کی تجویز پیش کی گئی جس کی آر ایس پی لیڈر این کے پریما چندرن نے تائید کی۔ اپوزیشن جماعتوں کے بہت سے دوسرے رہنما بھی کے سریش کا نام ایوان میں تجویز کیا گیا اور کئی ارکان اسمبلی نے ان کی حمایت کی۔
ایوان کے پروٹیم اسپیکر بھرتری ہری مہتاب نے صوتی ووٹ سے اوم برلا کو لوک سبھا اسپیکر منتخب کرنے کا اعلان کیا۔ چونکہ اپوزیشن جماعتوں نے ووٹوں کی تقسیم کا مطالبہ نہیں کیا تھا، اس لیے برلا کو صوتی ووٹ سے صدر منتخب کیا گیا۔
نیشنل ڈیموکریٹک الائنس (این ڈی اے) نے راجستھان کے کوٹا سے ایم پی اوم برلا کو اسپیکر عہدے کے لئے تیسری بار اپنا امیدوار بنایا تھا، جنہوں نے الیکشن جیت لیا ہے۔ وہیں، اپوزیشن انڈیا بلاک نے کیرالہ کے ماویلیکارا سے 8 بار کے رکن پارلیمنٹ کوڈی کنل سریش کو میدان میں اتارا تھا۔
وزیر اعظم مودی نے اوم برلا کو دوسری بار اسپیکر منتخب ہونے پر مبارکباد دی۔ پی ایم مودی نے کہا کہ ہم سب کو یقین ہے کہ آنے والے پانچ سالوں میں آپ ہم سب کی رہنمائی کریں گے۔ ہمارے صحیفوں میں کہا گیا ہے کہ ایک شائستہ اور خوش اخلاق شخص کامیاب سمجھا جاتا ہے، آپ کو تو مسکراہٹ بھی مل گئی ہے۔ آپ کی پیاری مسکراہٹ ہم سب کو خوش کرتی رہی ہے۔
وزیر اعظم مودی نے کہا، ’’دوسری بار اسپیکر کا چارج ملنے پر ہم نئے ریکارڈ بنتے دیکھ رہے ہیں۔ بلرام جاکھڑ کو اپنی پانچ سالہ مدت پوری کرنے کے بعد دوبارہ اسپیکر کی ذمہ داری ملی تھی۔ ان کے بعد آپ ہی کو یہ موقع ملا ہے۔ آپ جیت کر آئے ہیں۔ آپ نے ایک نئی تاریخ رقم کی ہے۔ ہم میں سے اکثر ارکان پارلیمنٹ آپ سے واقف ہیں۔ ایک رکن پارلیمنٹ کے طور پر، آپ کا کام کرنے کا طریقہ بھی جاننے اور سیکھنے کے قابل ہے۔‘‘
لوک سبھا میں قائد حزب اختلاف راہل گاندھی نے بھی اوم برلا کو لوک سبھا اسپیکر بننے پر مبارکباد دی۔ اس دوران راہل گاندھی نے کہا کہ حکومت کے پاس نمبر ہیں۔ لیکن اپوزیشن بھی ہندوستانی عوام کی آواز ہے۔ راہل نے کہا، ’’یہ بہت ضروری ہے کہ اپوزیشن کی آواز کو بھی ایوان میں اٹھانے دیا جائے۔‘‘
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔