نویں فیل طالب علم نے یوٹیوب کی مدد سے سیکھا نقلی نوٹ بنانا، پولیس نے کیا گرفتار

ممبئی: ممبئی پولیس کو اس وقت ایک بڑی کامیابی ہاتھ لگی جب اس نے ایک شخص کو نقلی نوٹوں کے ساتھ گرفتار کر لیا۔ خبر رساں ایجنسی کے مطابق گرفتار شدہ لڑکا زیادہ پڑھا لکھا نہیں ہے اور اس نے نوٹ بنانے کا طریقہ یوٹیوب سے سیکھا ہے۔ ملزم اب تک کافی نقلی نوٹ تیار کر چکا ہے اور اس نے ایک لاکھ روپے بازار میں چلائے بھی ہیں۔

نوی ممبئی گونہے برانچ کے اسسٹنٹ پولیس کمشنر اجے لانڈگے نے بتایا کہ ملزم نویں فیل ہے اور اس نے یوٹیوب دیکھ کر نقلی نوٹ بنانے کا طریقہ سیکھا تھا۔ انہوں نے بتایا کہ ملزم کے قبصہ سے دو لاکھ روپے سے زیادہ کے نقلی نوٹ برآمد کئے گئے ہیں، جنہیں پولیس نے ضبط کر لیا ہے۔ پولیس نے ملزم کے خلاف مقدمہ درج کر کے تحقیقات شروع کر دی ہیں۔

اسسٹنٹ پولیس کمشنر اجے لانڈگے نے بتایا کہ پولیس کو اطلاع موصول ہوئی تھی کہ ایک لڑکا بازار میں نقلی نوٹ چلا رہا ہے۔ اطلاع کے بعد پولیس نے لڑکے کو پکڑ کر پوچھ گچھ کی تو اس نے اپنے جرم کا اعتراف کر لیا اور انکشاف کیا کہ اس نے یوٹیوب پر ویڈیو دیکھ کر نقلی نوٹ بنانا سیکھا تھا۔

پولیس کے مطابق ملزم نے اب تک دو سو، پانچ سو اور ایک سو روپے کے نقلی نوٹ تیار کئے ہیں اور اب وہ دس اور بیس روپے کے نوٹ بھی بنانے کی تیاری میں تھا۔ پولیس کے مطابق ملزم کے علاوہ اس کے ایک معاون کو بھی گرفتار کیا گیا ہے۔

وہیں، اس معاملہ میں ایک تیسرا ملزم مفرور ہے۔ ملزم اب تک بازار میں ایک لاکھ روپے کے نوٹ چلا چکا ہے۔ جب لوگوں کو شبہ ہوا تو انہوں نے اس کی اطلاع پولیس کو دی، جس کے بعد یہ کارروائی عمل میں لائی گئی۔