اولڈ راجندر نگر میں احتجاج کرنے والے طلبہ سے ایم سی ڈی افسر کی ملاقات، احتجاج ختم کرنے کی اپیل

دہلی کے اولڈ راجندر نگر میں یو پی ایس سی کی تیاری کر رہے تین طالب علموں کی موت کے معاملے میں طلباء کا احتجاج جاری ہے۔ طلباء نے انتظامیہ کو الٹی میٹم دیا ہے کہ اگر ان کے مطالبات تسلیم نہ کیے گئے تو وہ بھوک ہڑتال کریں گے۔ اس دوران ایم سی ڈی کے ایڈیشنل کمشنر ڈاکٹر طارق تھامس نے احتجاج کرنے والے ان طلبہ سے ملاقات کرتے ہوئے ان سے احتجاج ختم کرنے کی اپیل کی ہے۔

ایم سی ڈی کے ایڈیشنل کمشنر ڈاکٹر طارق تھامس نے احتجاج کرنے والے طلبہ سے بات کی۔ انہوں نے طلبہ کو اس بات کی یقین دہانی کرائی کہ ان کے مطالبات حکومت تک پہنچا دیئے گئے ہیں۔ ڈاکٹر طارق تھامس نے تین طالب علموں کی موت پر افسوس کا اظہار کیا اور کہا کہ ہم یہ بات تسلیم کرتے ہیں کہ نظام اور حکومت کے مسائل رہے ہیں اور غلطیاں ہوئی ہیں۔ حکومت نے کارروائی کی ہے نیز آئندہ بھی کرتی رہے گی۔ اس معاملے کے خلاف مقدمات درج کر تے ہوئے ایک کمیٹی بنائی گئی ہے۔

ایڈیشنل کمشنر ڈاکٹر طارق تھامس نے کہا کہ حکومت اور انتظامیہ آپ کے مطالبات پر غور کر رہی ہے اور آپ کی آواز سنی جا رہی ہے۔ انہوں نے احتجاج کرنے والے طلباء سے اپنا احتجاج ختم کرنے کی اپیل کی، کیونکہ اس معاملے میں انتظامیہ کو بھی اپنا کام کرنا ہے۔ حکومت نے مرنے والوں کے لیے معاوضے کا اعلان کیا ہے۔ فی الوقت 10 لاکھ روپے کے معاوضے کا اعلان کیا گیا ہے۔ آپ لوگ جو مطالبہ کر رہے ہیں اس پر بھی غور کیا گیا ہے۔ آپ کے تمام مطالبات حکومت کے پاس ہے۔

واضح رہے کہ 27 جولائی کو دہلی کے اولڈ راجندر نگر میں واقع ایک کوچنگ سینٹر کے بیسمنٹ میں پانی بھر جانے کی وجہ سے تین طالب علموں کی ڈوبنے سے موت ہو گئی تھی۔ طلباء کی ان اموات کے خلاف راجندر نگر میں طلباء مسلسل احتجاج کر رہے ہیں۔ طلبہ کا کہنا ہے کہ ہمیں بتایا گیا ہے کہ ہمارے مطالبات مان لیے گئے ہیں لیکن ہمیں یقین نہیں ہے، کیونکہ ہمیں تحریری طور پر کچھ بھی نہیں دیا گیا ہے۔ ہم دہلی کے لیفٹیننٹ گورنر سے ملاقات کریں گے۔