کنگنا رانوت کو تھپڑ مارنے والی سی آئی ایس ایف کانسٹیبل کلوندر کور کا تبادلہ، تحقیقات مکمل ہونے تک بنگلورو میں تعیناتی

اداکارہ اور بی جے پی کی رکن پارلیمنٹ کنگنا رانوت کو چنڈی گڑھ ایئرپورٹ پر مبینہ طور پر تھپڑ مارنے والی سی آئی ایس ایف کانسٹیبل کلوندر کور کا تبادلہ کر دیا گیا ہے۔ کور کو تادیبی انکوائری مکمل ہونے تک بنگلورو میں ایک یونٹ میں منتقل کیا گیا ہے۔

کلوندر کور نے نو منتخب رکن اسمبلی کنگنا رانوت کو اس وقت تھپڑ مارا گیا تھا جب وہ دہلی روانہ ہونے کے لیے چنڈی گڑھ ایئرپورٹ پر پہنچی تھیں۔ سی آئی ایس ایف نے کور کو فوری طور پر معطل کر دیا تھا اور ان کے خلاف ایف آئی آر بھی درج کرا دی تھی۔

رپورٹ میں ذرائع کے حوالہ سے بتایا گیا ہے کہ کلوندر کور کو معطلی کا ساسمنا ہے اور ان کو تادیبی انکوائری مکمل ہونے تک کرناٹک کی راجدھانی بنگلورو میں 10ویں ریزرو بٹالین میں تعینات کیا گیا ہے۔ مزید یہ کہ انہیں اس یونٹ میں اس لیے بھیجا گیا ہے تاکہ اس واقعہ کی غیر جانبدارانہ تحقیقات کو یقینی بنایا جا سکے۔

ذرائع کے مطابق ایک سینئر کمانڈنٹ لیول کا افسر واقعہ کی تحقیقات کر رہا ہے اور کانسٹیبل، ان کے ساتھیوں، شفٹ انچارج اور ایئر لائن کے کچھ اہلکاروں کے بیانات قلم بند کیے جا رہے ہیں جو اس دن ایئرپورٹ پر موجود تھے۔ انہوں نے کہا کہ تحقیقات میں کچھ وقت لگے گا جس کے بعد مناسب فیصلہ کیا جائے گا۔

کلوندرد کور کا تعلق پنجاب کے ضلع کپورتھلا سے ہے اور وہ 2009 میں سی آئی ایس ایف میں شامل ہوئی تھیں۔ وہ 2021 سے چنڈی گڑھ ہوائی اڈے پر سی آئی ایس ایف کے ایوی ایشن سیکورٹی گروپ کا حصہ تھیں۔ اب تک ان کے خلاف کوئی ویجیلنس تحقیقات نہیں ہوئی ہے اور نہ ہی سی آئی ایس ایف میں شمولیت کے بعد انہیں کوئی سزا ملی ہے۔ ان کے شوہر بھی چنڈی گڑھ ایئرپورٹ پر تعینات تھے۔ دراصل، کور ملک میں کسانوں کی تحریک کے حوالہ سے ہماچل پردیش کی منڈی سیٹ سے لوک سبھا کی رکن منتخب ہو چکیں رانوت کے موقف سے ناراض تھیں۔

واقعہ کے دن کنگنا نے دہلی کے اندرا گاندھی بین الاقوامی ہوائی اڈے پر پہنچنے کے بعد سی آئی ایس ایف حکام کو اطلاع دی تھی کہ جب چنڈی گڑھ ایئرپورٹ پر ایک خاتون کانسٹیبل نے انہیں تھپڑ مارا اور ان کے ساتھ بدسلوکی کی۔ کنگنا نے اپنے ایکس ہینڈل پر اپ لوڈ کی گئی ایک ویڈیو میں کہا تھا، ’’مجھے منہ پر تھپڑ مارا گیا۔ میرے ساتھ بدسلوکی کی گئی۔ میں محفوظ ہوں لیکن پنجاب میں دہشت گردی سے پریشان ہوں۔‘‘

اس واقعے کے بعد گزشتہ ڈھائی سال سے چنڈی گڑھ ایئرپورٹ پر ڈیوٹی پر تعینات کانسٹیبل کور کی ویڈیو ٹی وی چینلز اور سوشل میڈیا پر گردش کرنے لگی، جس میں انہیں کہتے ہوئے سنا گیا کہ وہ کسان تحریک کے دوران کنگنا کے دئے گئے بیانات سے ناراض تھیں۔ کور نے کہا، ’’انہوں (کنگنا) نے بیان دیا تھا کہ کسان 100 روپے کے لیے احتجاج کر رہے ہیں، کیا وہ وہاں جا کر بیٹھیں گی؟ جب انہوں نے یہ بیان دیا تو میری ماں وہیں بیٹھی ہوئی تھیں اور احتجاج کر رہی تھی۔‘‘