اڈوانی کی طبیعت پھر بگڑ ی، اسپتال میں کیا داخل
لال کرشن اڈوانی کے دفتر سے دی گئی معلومات میں کہا گیا ہے کہ انہیں معمول کے چیک اپ کے لیے اسپتال میں داخل کرایا گیا ہے۔
![<div class="paragraphs"><p>فائل تصویر آئی اے این ایس</p></div>](https://media.assettype.com/qaumiawaz%2F2024-07%2F964633ee-3441-4865-ac99-3eef5735a1cc%2FAdvani_Bharat_Ratan.jpeg?rect=0%2C0%2C951%2C535&auto=format%2Ccompress&fmt=webp)
فائل تصویر آئی اے این ایس
بی جے پی کے سینئر رہنما لال کرشن اڈوانی کی صحت بدھ یعنی3 جولائی کو ایک بار پھر بگڑ گئی۔ لال کرشن اڈوانی کو فوری طور پر دہلی کے اپولو اسپتال میں داخل کرایا گیا۔ خبر رساں ایجنسی اے این آئی کے مطابق ڈاکٹر ونیت پوری اپولو اسپتال میں ایل کے اڈوانی کا علاج کر رہے ہیں۔ انہوں نے کہا کہ بی جے پی لیڈر کی حالت مستحکم ہے۔
اس کے ساتھ ہی لال کرشن اڈوانی کے دفتر سے دی گئی معلومات میں کہا گیا ہے کہ انہیں معمول کے چیک اپ کے لیے اسپتال میں داخل کرایا گیا ہے۔ اس سے قبل 27 جون کو بھی ایل کے اڈوانی کو طبیعت خراب ہونے کی وجہ سے ایمس اسپتال میں داخل کرایا گیا تھا۔
ملک کے 96 سالہ سابق نائب وزیر اعظم لال کرشن اڈوانی کو 26 جون کی رات دیر گئے دہلی کے ایمس میں داخل کرایا گیا تھا۔ اس دوران ان کے اہل خانہ کی جانب سے کہا گیا کہ انہیں عمر سے متعلق صحت کے مسائل کی وجہ سے اسپتال میں داخل کرایا گیا تھا۔ تاہم اگلے ہی دن انہیں ہسپتال سے چھٹی دے دی گئی تھی۔
لال کرشن اڈوانی کو طویل عرصے سے عمر سے متعلق صحت کے مسائل کا سامنا ہے۔ اس وجہ سے گھر پر وقتاً فوقتاً ان کا چیک اپ کیا جاتا ہے۔ لال کرشن اڈوانی کو 30 مارچ 2024 کو بھارت رتن سے نوازا گیا۔ صدر دروپدی مرمو نے اڈوانی کی رہائش گاہ پر انہیں یہ اعزاز دیا تھا۔
لال کرشن اڈوانی نے بھارت رتن ایوارڈ کے لیے صدر اور وزیر اعظم مودی کا شکریہ ادا کیا تھا۔ اس دوران انہوں نے کہا تھا کہ یہ نہ صرف ان کے لیے بلکہ ان کے نظریات اور اصولوں کے لیے بھی اعزاز ہے۔ سال 2015 میں لال کرشن اڈوانی کو ملک کا دوسرا سب سے بڑا شہری اعزاز پدم وبھوشن سے بھی نوازا گیا۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔