’اگر آپ اپنی سیاسی ترجیحات کے تحت حکومت چلائیں گے تو الگ-تھلگ پڑ جائیں گے‘، پی ایم مودی کو وزیر اعلیٰ اسٹالن کا انتباہ

مرکز کی جانب سے پیش کیے گئے 2024-25 کے عام بجٹ سے ناراض تامل ناڈو کے وزیر اعلیٰ ایم کے اسٹالن نے پی ایم مودی کو سخت انتباہ دیا ہے۔ انہوں نے پی ایم مودی کو مخاطب کرتے ہوئے کہا ہے کہ اگر آپ اپنی سیاسی پسند و ناپسند کے مطابق حکومت چلائیں گے تو آپ الگ-تھلگ پڑ جائیں گے۔ وزیر اعلیٰ اسٹالن نے یہ بھی کہا ہے کہ مرکزی حکومت کی جانب سے پیش کیا گیا بجٹ آپ کے اقتدار کو بچائے گا، ہندوستان کو نہیں۔

تامل ناڈو کے وزیر اعلیٰ ایم کے اسٹالن نے بدھ (24 جولائی) کو سوشل میڈیا پلیٹ فارم ’ایکس‘ پر پوسٹ کیا ہے۔ محترم وزیر اعظم نریندر مودی صاحب، آپ نے کہا تھا کہ انتخابات ختم ہو چکے ہیں، اب ملک کے بارے میں سوچنا چاہیے، لیکن کل کا بجٹ آپ کی حکومت کو بچانے کے لیے تھا، ہندوستان کو بچانے کے لیے نہیں تھا۔ انہوں نے کہا ہے کہ آپ عام انداز میں حکومت چلائیں اور ان لوگوں سے بدلہ لینے کے بارے میں نہ سوچیں جنہوں نے آپ کو ابھی تک ہرایا ہے۔ میں یہ مشورہ دینے کا پابند ہوں کہ اگر آپ اپنی سیاسی پسند اور ناپسند کے مطابق حکومت چلائیں گے تو آپ الگ تھلگ پڑ جائیں گے۔

وزیر اعلیٰ ایم کے اسٹالن نے اپنی پوسٹ کے ساتھ ایک ویڈیو بھی شیئر کیا ہے۔ اس ویڈیو میں اپوزیشن پارٹیوں کے لیڈران پارلیمنٹ کے باہر اپنے ہاتھوں میں پلے کارڈ لے کر احتجاج کر رہے ہیں۔ اس میں سے ایک پلے کارڈ پر لکھا ہے کہ ’دیش مانگتا انڈیا کا بجٹ، نہیں چاہئے این ڈی اے کا بجٹ‘۔

قبل ازیں تمل ناڈو کے وزیر اعلی ایم کے اسٹالن نے منگل (23 جولائی) کو کہا کہ مرکزی بجٹ میں ریاست کو مکمل طور پر نظر انداز کیا گیا اور انہوں نے اس کی مذمت کی۔ انہوں نے کہا کہ وہ 27 جولائی کو دہلی میں وزیر اعظم نریندر مودی کی صدارت میں نیتی آیوگ کے اجلاس کا بائیکاٹ کریں گے۔ بجٹ کو انتہائی مایوس کن قرار دیتے ہوئے اسٹالن نے کہا کہ چونکہ مرکزی حکومت نے تمل ناڈو کو مکمل طور پر نظر انداز کیا ہے، اس لیے نیتی آیوگ کے اجلاس کا بائیکاٹ کرنا مناسب ہوگا۔

تمل ناڈو کے وزیر اعلیٰ نے کہا کہ مرکزی حکومت نے تمل ناڈو کے لیے ’میٹرو ریل اسکیم‘ کا اعلان کیا تھا لیکن اس کے لیے کوئی فنڈز مختص نہیں کیا گیا تھا۔ انہوں نے کہا کہ ریاست کو اب تک دھوکہ دیا جا رہا ہے۔ ایم کے اسٹالن نے کہا کہ اسی طرح اس بات کی بھی کوئی گارنٹی نہیں ہے کہ بہار اور آندھرا پردیش کا حشر تمل ناڈو جیسا نہیں ہوگا۔ اسٹالن نے کہا کہ وزیر خزانہ نرملا سیتا رمن اس حکومت کو حمایت کرنے والی پارٹیوں کے علاوہ سب کو بھول گئی ہیں۔ ان کے پاس ریاست کے لیے کوئی خاص منصوبہ نہیں ہے۔ ہمارا کوئی مطالبہ پورا نہیں ہوا۔ 

دریں اثنا ڈی ایم کے کے رکن پارلیمنٹ دیاندھی مارن نے وزیر اعظم نریندر مودی کو مشورہ دیا ہے کہ وہ ان لوگوں کے لیے بھی کام کریں جنہوں نے انہیں ووٹ نہیں دیا ہے۔ مارن نے کہا ہے کہ میرا ماننا ہے کہ پی ایم مودی کو ایم کے اسٹالن سے اچھا مشورہ لے کر اس پر عمل کرنا چاہئے کیونکہ وہ ان لوگوں کے لیے بھی کام کرتے ہیں جنہوں نے انہیں ووٹ نہیں دیا ہے۔