پنجاب اسمبلی انتخاب: عآپ کے وزیر اعلیٰ امیدوار بھگونت مان شراب کے ہیں عادی، بی جے پی نے لگائے کئی سنگین الزامات

عام آدمی پارٹی (عآپ) کی طرف سے کامیڈین سے لیڈر بنے بھگونت مان کو پنجاب ریاست کے لیے وزیر اعلیٰ عہدہ کے امیدوار کی شکل میں پیش کیے جانے کے کچھ دن بعد بی جے پی نے بھگونت مان کو عوامی طور پر بھدے چٹکلے سنانے والا ایڈکٹ کہہ کر پارٹی پر حملہ کیا ہے۔ بی جے پی دہلی کے صدر آدیش گپتا نے خبر رساں ایجنسی آئی اے این ایس سے کہا کہ ’’خود پی کر اور عوامی تقاریب میں لوگوں کے درمیان گندے مذاق کرنے سے کوئی بھی تصور کر سکتا ہے کہ مان پنجاب کے لوگوں کے ساتھ کیا کریں گے۔ یہ مضحکہ خیز ہے کہ شراب کے عادی لوگ اب شراب بندی کی باتیں کر رہے ہیں۔‘‘

آدیش گپتا نے اس بات کی بھی تردید کی کہ کیجریوال کی پارٹی کو بھگونت مان کے حق میں 22 لاکھ سے زیادہ کال آئے۔ انھوں نے کہا کہ کیجریوال کہہ رہے ہیں تین دنوں میں سب سے زیادہ کال بھگونت مان کے لیے آئے، جب کہ پورے تین دنوں میں 2 لاکھ 59 ہزار 200 سیکنڈ کا وقت بنتا ہے، کیجریوال اس مدت میں بھگونت مان کے لیے 22 لاکھ سے زیادہ کال کا دعویٰ کر رہے ہیں جو کہ ایک سفید جھوٹ ہے۔ یہ تو مضحکہ خیز بات ہو گئی، کیا کوئی یقین کرے گا کہ فی سکنڈ 10 کال آئے ہوں گے۔

گزشتہ ہفتے عام آدمی پارٹی نے پنجاب کے لوگوں سے وزیر اعلیٰ کے لیے اپنی پسند کا نام دینے کے لیے 7074870748 پر ڈائل کرنے، وہاٹس ایپ یا ایس ایم ایس کرنے کے لیے کہا تھا۔ ایسا کر کے وہ پنجاب میں اپنے وزیر اعلیٰ عہدہ کے امیدوار کا اعلان کرنے والی پہلی پارٹی بن گئی ہے۔ 20 فروری کو ہونے والے انتخاب کے ریزلٹ 10 مارچ کو اعلان کیے جائیں گے۔

حزب مخالف لیڈر رام ویر سنگھ بدھوڑی نے بدھ کو ایک پریس کانفرنس کے دوران کہا کہ کیجریوال نے خود ایک بار بھگونت مان کے بارے میں کہا تھا کہ وہ ہمیشہ نشے میں رہتے ہیں۔ بدھوڑی نے مزید کہا کہ ’’پھر انھوں نے (کیجریوال نے) کہا کہ مان نے انھیں یقین دلایا ہے کہ وہ اسے (شراب کو) چھوڑ دیں گے۔ اس لیے سب سے اہم بات یہ ہے کہ کیجریوال اور مان دونوں کو لوگوں کو بتانا چاہیے کہ مان نے حقیقت میں اسے چھوڑ دیا ہے یا نہیں۔‘‘

رام ویر سنگھ بدھوڑی نے پنجاب عآپ کے وزیر اعلیٰ امیدوار پر دہلی میں ہزاروں شراب کی دکانیں کھولنے اور عآپ لیڈروں اور شراب مافیا کے درمیان پیسے کے لین دین کو سہولت پر مبنی بنانے کا الزام لگایا۔ یہ الزام عائد کرتے ہوئے عآپ حکومت شہر بھر میں شراب کی دکانیں کھولنے کی حوصلہ افزائی کر رہی ہے، بھگوا پارٹی دہلی حکومت کی نئی آبکاری پالیسی کی مخالفت کرتی رہی ہے۔ اس کا کہنا ہے کہ یہ نئی دہلی ماسٹر پلان کی خلاف ورزی ہے۔