بہار: انتخابی دشمنی میں فائرنگ، ایک شخص ہلاک، بی جے پی لیڈر حراست میں، سارن اور چھپرا میں انٹرنیٹ خدمات معطل

پٹنہ: بہار کے چھپرا میں آج صبح (21 مئی) انتخابی دشمنی کی وجہ سے دو گروپوں کے درمیان فائرنگ ہوئی۔ اس واقعے میں ایک شخص کی موت ہو گئی ہے جبکہ دو افراد زخمی ہوئے ہیں۔ ایک زخمی کو علاج کے لیے پٹنہ ریفر کیا گیا ہے۔ یہ واقعہ چھپرا کے نگر تھانہ علاقے کے بھکاری ٹھاکر چوک میں پیش آیا۔

سارن کے ڈی ایم امن سمیر نے کئی راؤنڈ فائر کئے جانے اور موت کی تصدیق کی ہے۔ سارن میں گزشتہ پیر (20 مئی) کے انتخابات کے دوران بوتھ نمبر 118 پر ووٹنگ کے دوران کشیدگی بڑھ گئی تھی۔ اس کے بعد یہ ہنگامہ ہوا۔ اس معاملے میں پولیس نے بی جے پی لیڈر رماکانت سنگھ سولنکی کو حراست میں لے لیا ہے۔

چھپرا کے ایس پی گورو منگلا نے کہا کہ ’’پیر کو جھگڑا ہوا تھا۔ یہ واقعہ آر جے ڈی اور بی جے پی کارکنوں کے درمیان ہوا۔ اسی سلسلے میں آج واقعہ پیش آیا۔ تین افراد کو گولی مار دی گئی ہے۔ ایک کی موت ہو گئی ہے۔ ایک شخص کو پٹنہ ریفر کیا گیا ہے۔ ایک شخص خطرے سے باہر ہے۔ اس واقعے کے پیچھے کون ہے، ہم تحقیقات کر کے مناسب کارروائی کریں گے۔‘‘ بہار کے سارن اور چھپرا میں پولنگ کے بعد تشدد کے پیش نظر احتیاطی اقدام کے طور پر دو دن کے لیے انٹرنیٹ سروسز بند کر دی گئی ہیں۔ یہ جانکاری ایس پی گورو منگلا نے دی ہے۔