پہلوان گیتا-ببیتا پھوگاٹ کی بہن ریتیکا پھوگاٹ نے کی خودکشی، اہل خانہ حیران!

ہندوستان کی اسٹار خاتون پہلوان ببیتا پھوگاٹ اور گیتا پھوگاٹ کی ممیری بہن ریتیکا پھوگاٹ نے ایک کشتی ٹورنامنٹ میں میچ ہارنے کے بعد خودکشی کر لی ہے۔ ان کے اس قدم سے ان کے اہل خانہ کے ساتھ ساتھ کھیل طبقہ بھی حیرت میں ہے۔ 17 سال کی ریتیکا نے راجستھان کے بھرت پور واقع لوہا گڑھ میں منعقد اسٹیٹ لیول سب جونیئر ٹورنامنٹ میں حصہ لیا تھا۔ اس ٹورنامنٹ کے فائنل مقابلے میں ریتیکا ایک پوائنٹ سے ہار گئی تھیں۔ اس شکست سے مایوس ہو کر انھوں نے پھانسی لگا کر اپنی جان دے دی۔

خبروں کے مطابق ریتیکا نے بدھ کی رات تقریباً 11 بجے پھانسی لگا کر خودکشی کر لی۔ انھوں نے اپنے پھوپھا اور درونا چاریہ ایوارڈ یافتہ کوچ مہابیر پھوگاٹ سے کشتی کی ٹریننگ لی تھی۔ مہابیر بھی فائنل کے دن مقابلے کے وقت موجود تھے۔ بہن ریتو پھوگاٹ نے ریتیکا کی موت پر اظہار غم کرتے ہوئے ٹوئٹ پر لکھا ’’چھوٹی بہن ریتیکا کی روح کو بھگوان سکون عطا کرے۔ مجھے اب بھی یقین نہیں ہو رہا ہے کہ آپ (ریتیکا) کے ساتھ کیا ہوا۔ آپ ہمیشہ ہمیں یاد آئیں گی۔‘‘