جاپان میں پھر طیارہ حادثہ، ایئرپورٹ پر 2 مسافر طیارے آپس میں ٹکرائے

جاپان میں ایک بار پھر طیارہ حادثہ کی خبریں سامنے آ رہی ہیں۔ بتایا جا رہا ہے کہ ہوکائیڈو میں نیوچیٹوس ہوائی اڈے پر جنوبی کوریا کا ایک طیارہ ہانگ کانگ کے کیتھے پیسفک طیارہ سے ٹکرا گیا۔ اچھی بات یہ رہی کہ اس حادثہ میں کسی کی ہلاکت نہیں ہوئی ہے۔ لیکن ایئرپورٹ پر ایک بار پھر دو طیارہ کا آپس میں ٹکرانا قابل تشویش ہے۔

میڈیا رپورٹس کے مطابق جنوبی کوریا کا کورین ایئر پلین اور ہانگ کانگ کا کیتھے پیسفک پلین آپس میں ٹکرا گئے جس کے بعد ایئرپورٹ پر افرا تفری پھیل گئی۔ اس معاملے میں سی جی ٹی این نے جانکاری دیتے ہوئے فائر بریگیڈ محکمہ کے حوالے سے بتایا کہ کیتھے پیسفک طیارہ نیو چیٹوس ہوائی اڈے پر کھڑا تھا، تبھی شام کے وقت کوریائی ایئرلائنز کے آگے بڑھتے طیارہ نے اسے ٹکر مار دی۔

جاپان کی لوکل میڈیا ’فجی ٹی وی‘ نے اپنی رپورٹ میں اس حادثہ کے تعلق سے بتاتے ہوئے کہا کہ ایک مسافر طیارہ ہوائی اڈے پر کھڑا تھا اور دوسرے مسافر طیارہ کی لینڈنگ تقریباً مکمل ہو چکی تھی۔ یہی وجہ ہے کہ جب ٹکر ہوئی تو بہت شدید نہیں تھی اور کسی جانی یا مالی نقصان کی کوئی خبر فی الحال نہیں ملی ہے۔

دوسری طرف کورین ایئرلائنز کے ترجمان نے گلوبل ٹائمز کو بتایا کہ اس حادثہ میں کوئی بھی زخمی نہیں ہوا ہے۔ واقعہ 16 جنوری کو اس وقت پیش آیا جب کوریائی ایئر کی پرواز کے ای 766، جو جاپان کے ہوکائیڈو میں نیو چیٹوس ہوائی اڈے سے جنوبی کوریا کے سیول انچیون بین الاقوامی ہوائی اڈہ کے لیے پرواز بھرنے والی تھی۔ میڈیا رپورٹس میں یہ بھی بتایا جا رہا ہے کہ طیارہ کو پارکنگ والی جگہ پر ڈی-آئسنگ آپریشن پورا کرنے کے بعد گراؤنڈ ہینڈلنگ کمپنی کا ٹریکٹر کھینچ رہا تھا۔ اس کھیچنے کے عمل کے دوران زمین پر برف کی وجہ سے ٹریکٹر پھسل گیا۔ کورین ایئر نے گلوبل ٹائمز سے کہا کہ اس کے بعد طیارہ کا بایاں پنکھا بغل کے پارکنگ والی جگہ پر کھڑے کیتھے پیسفک کی پرواز سی ایکس 583 سے ٹکرا گیا۔

واضح رہے کہ اس سے قبل 2 جنوری کو جاپان میں رَنوے پر دو طیاروں کی ٹکر ہو گئی تھی جس میں 6 افراد ہلاک ہو گئے تھے۔ قابل ذکر بات یہ ہے کہ مسافر طیارہ میں سینکڑوں افراد سوار تھے اور سبھی کو ایمرجنسی ایگزٹ دروازہ سے نکال کر بچا لیا گیا تھا۔ جن 6 افراد کی موت ہوئی تھی وہ کوسٹ گارڈ طیارہ میں تھے۔ اس حادثہ میں دونوں ہی طیاروں میں آگ لگ گئی تھی جس کی خوفناک تصویریں اور ویڈیوز سوشل میڈیا پر سامنے آئی تھیں۔