کسی کو وقف بورڈ اور مندروں کی جائیدادوں کو ہاتھ لگانے کی اجازت نہیں دیں گے: ادھو ٹھاکرے

ممبئی: مہاراشٹر کے سابق وزیر اعلیٰ اور شیو سینا (یو بی ٹی) کے لیڈر ادھو ٹھاکرے نے مہا وکاس اگھاڑی کی کے اجلاس کے بعد ایک تقریب سے خطاب کیا۔ اس دوران ادھو نے کئی مسائل پر اپنے خیالات کا اظہار کیا۔ اپوزیشن اتحاد ایم وی اے کے پارٹی کارکنوں سے خطاب کرتے ہوئے ٹھاکرے نے کہا کہ اسمبلی انتخابات مہاراشٹر کی عزت نفس کو بچانے کی لڑائی ہے۔

اس دوران شیو سینا کے سربراہ ادھو ٹھاکرے نے ایک بڑا بیان دیتے ہوئے کہا کہ وہ کانگریس اور نیشنلسٹ کانگریس پارٹی (شرد چندر پوار) کی طرف سے مہا وکاس اگھاڑی (ایم وی اے) کے وزیر اعلیٰ کے عہدے کے چہرے کے طور پر اعلان کردہ کسی بھی امیدوار کی حمایت کریں گے۔

ادھو ٹھاکرے نے کہا، ’’مہا وکاس اگھاڑی اتحاد کو وزیر اعلیٰ کے چہرے کا فیصلہ کرنے دیں۔ کانگریس اور این سی پی-ایس پی کو اپنے اپنے وزیر اعلیٰ کے امیدواروں کا نام تجویز کرنے دیں۔ ہم اس کی حمایت کریں گے۔ ہمیں مہاراشٹر اور ملک کی بہتری کے لیے کام کرنا ہے اور میں 50 دھوکہ بازوں اور غداروں کو بھی جواب دینا چاہتا ہوں کہ لوگ ہمیں چاہتے ہیں، انہیں نہیں!‘‘

ٹھاکرے نے کہا، ’’میں اپنے لیے نہیں بلکہ مہاراشٹر کے حقوق کے لیے لڑ رہا ہوں۔ وزیر اعلیٰ کے امیدوار کا فیصلہ پہلے کیا جانا چاہیے نہ کہ اس بنیاد پر کہ جو پارٹی انتخابات میں سب سے زیادہ سیٹیں جیتے۔‘‘

خیال رہے کہ مہاراشٹر میں اکتوبر یا نومبر میں اسمبلی انتخابات ہونے کا امکان ہے۔ ایم وی اے میں شیو سینا (یو بی ٹی)، شرد پوار کی زیر قیادت این سی پی اور کانگریس شامل ہیں۔ ٹھاکرے نے ایم وی اے کارکنوں سے کہا کہ وہ ذاتی مفادات سے اوپر اٹھ کر مہاراشٹر کے وقار اور مفاد کے تحفظ کے لیے لڑیں۔

وزیر اعظم نریندر مودی نے یوم آزادی کے موقع پر اپنے خطاب میں ملک میں سیکولر سول کوڈ کی وکالت کی تو ٹھاکرے نے پوچھا کہ کیا انہوں نے ہندوتوا چھوڑ دیا ہے؟ اس کے علاوہ ادھو نے پوچھا کہ جب بھارتیہ جنتا پارٹی مکمل اکثریت میں تھی تو وقف (ترمیمی) بل پاس کیوں نہیں ہوا؟ انہوں نے مزید کہا کہ وہ کسی کو وقف بورڈ اور مندروں کی جائیدادوں کو ہاتھ لگانے کی اجازت نہیں دیں گے۔

ادھو ٹھاکرے نے کہا، ’’میں اعلان کر رہا ہوں کہ اگر کوئی وقف بورڈ یا کسی مندر یا مذہبی املاک کو چھونے کی کوشش کرتا ہے تو میں ایسا نہیں ہونے دوں گا۔ یہ میرا وعدہ ہے۔ یہ کسی بورڈ کا سوال نہیں ہے بلکہ ہمارے مندروں کا معاملہ ہے۔ جیسا کہ شنکراچاریہ نے کہا ہے کہ کیدارناتھ مندر سے 200 کلو سونا چوری ہوا ہے، تو اس کی تحقیقات ہونی چاہیے۔‘‘

ٹھاکرے نے مزید کہا، ’’میں اس پر بات کرنے کے لیے تیار ہوں کہ آپ (مہایوتی) اور ہم (مہا وکاس اگھاڑی) نے اس ملک اور ریاست کے لیے کیا کیا۔ وہ بلدیاتی انتخابات نہیں کروا رہے اور نہ ہی انہوں نے ابھی تک الیکشن کی تاریخوں کے حوالے سے کوئی فیصلہ کیا ہے۔