بنگلہ دیش میں کرکٹ کا بھی تختہ پلٹ، بورڈ کے صدر نے کی استعفے کی پیش کش

ڈھاکہ: بنگلہ دیش میں طلبہ کی تحریک اور پھر تختہ پلٹ کے بعد بنگلہ دیش کرکٹ بورڈ (بی سی بی) میں تبدیلی ہونے جا رہی ہے۔ بنگلہ دیش کرکٹ بورڈ کے سربراہ نظم الحسن کے مستعفی ہونے کا امکان بڑھ گیا ہے، کیونکہ بورڈ حکام نے 15 اگست کو کہا تھا کہ وہ بورڈ میں اصلاحات کے لیے حکومت کے ساتھ مل کر کام کرنے کو تیار ہیں۔

بی سی بی کے صدر کے طور پر یہ نظم الحسن کی چوتھی مدت کار ہے۔ حسن فی الحال اپنی اہلیہ کے ساتھ لندن میں روپوش ہیں۔ ملک میں جاری طلبہ کے احتجاج اور سیاسی بحران کے درمیان وہ محفوظ مقام پر چلے گئے ہیں۔ دریں اثنا، سابق وزیر اعظم شیخ حسینہ سے روابط رکھنے والے کئی دیگر کلیدی بورڈ ڈائریکٹرز بھی روپوش ہو گئے ہیں۔

ڈھاکہ میں 14 اگست کو ہونے والی میٹنگ میں بی سی بی کے کچھ ڈائریکٹرز نے بورڈ میں اصلاحات کے لیے اگلے اقدامات پر تبادلہ خیال کیا۔ انہوں نے نظم الحسن کی سربراہی میں قائم کمیٹی کے استعفے کا مطالبہ کیا۔ بی سی بی کے ایک ڈائریکٹر نے کہا- ’’ہمارے ایک ڈائریکٹر نے نظم الحسن سے رابطہ کیا ہے، انہوں نے کہا کہ وہ حکومت کے ساتھ تعاون کرنے اور ضرورت پڑنے پر عہدہ چھوڑنے کو تیار ہیں۔‘‘

دوسرے ڈائریکٹر نے بھی اس کی تصدیق کرتے ہوئے کہا کہ اگر بورڈ کو کسی منتخب ادارے کے تحت چلایا جائے تو انہیں عبوری حکومت سے مکمل تعاون درکار ہوگا۔ حال ہی میں اسپورٹس ایڈوائزر آصف محمود نے بی سی بی حکام سے ملاقات کی تاکہ یہ دیکھا جا سکے کہ آیا بورڈ آئی سی سی کے قوانین کے تحت عبوری سربراہ کا تقرر کر سکتا ہے؟

موجودہ بورڈ کی میعاد اکتوبر 2025 تک ہے، اس لیے ڈائریکٹرز کو خدشہ ہے کہ استعفوں سے اس سال اکتوبر میں بنگلہ دیش میں ہونے والے ویمنز ٹی-20 ورلڈ کپ پر اثر پڑ سکتا ہے۔

اس وقت بورڈ کے کا م کاج کے حوالے سے کئی سوالات اٹھ رہے ہیں جن میں عبوری بورڈ کا امکان اور آئی سی سی کی جانب سے ممکنہ کارروائی بھی شامل ہے۔ ڈائریکٹر نے کہا کہ آئین میں عبوری بورڈ کا کوئی بندوبست نہیں ہے، لیکن عبوری انتخابات کی گنجائش موجود ہے۔