ذات پر مبنی مردم شماری سے کون انکار کرسکتا ہے؟ یہ لالو پرساد کی پہل کا نتیجہ ہے: تیجسوی یادو

آر جے ڈی رہنما اور بہار کے سابق نائب وزیراعلیٰ تیجسوی یادو نے ذات پر مبنی مردم شماری کے معاملے پر ایک مرتبہ پھر مرکز کی برسراقتدار مودی حکومت کو تنقید کا نشانہ بنایا ہے۔ انہوں نے آر ایس ایس کے ذات پر مبنی مردم شماری کے موقف پر جوابی حملہ کرتے ہوئے کہا کہ ذات پر مبنی مردم شماری سے کون انکار کر سکتا ہے؟ لیکن لوگوں کو بی جے پی کے ایجنڈے کو سمجھنا ہوگا۔ تیجسوی نے یہ بھی کہا کہ کسی سے بھی پوچھ لیجئے لالو پرساد کی پہل کا نتیجہ ہے جو آج  ذات پر مبنی مردم شماری کو تسلیم کرنے کی بات ہو رہی ہے۔

تیجسوی یادو نے پیر کو میڈیا سے بات کرتے ہوئے کہا کہ یہ لوگ نہیں چاہتے ہیں کہ ذات پر مبنی مردم شماری ہو ورنہ بار بار بی جے پی عدالت میں لوگوں کو اس کے خلاف کھڑا نہیں کرتی، ان کے جواب سے واضح ہو گیا ہے کہ وہ ذات پر مبنی مردم شماری کے حق میں نہیں ہیں، ان کے کہنے اور کرنے میں کافی فرق ہے۔ انہوں نے اس موقع پر ایک سوال کے جواب میں کہا کہ ان لوگوں (بی جے پی والوں) کو ریزرویشن سے کوئی مطلب نہیں، وہ بابا صاحب کے آئین کو تبدیل کرنا چاہتے ہیں، ان کا اصل ایجنڈا صرف آئین بدلنا ہے۔

تیجسوی یادو نے وزیراعظم نریندر مودی کی تنقید کرتے ہوئے کہا کہ وہ امن کی بات کرتے ہیں، بدھ اور گاندھی کی بھی بات کرتے ہیں، لیکن یہاں تو ان کا دوہرا چہرہ نظر آ رہا ہے۔ غضب ہپوکریسی ہے۔ یہاں آپ کے رہنما دن بھر گالی دیتے رہتے ہیں، مارنے کاٹنے کی بات کرتے ہیں، تشدد کی بات کرتے ہیں۔ تیجسوی نے بی جے پی پر لوگوں کو بھڑکانے کا الزام لگاتے ہوئے کہا کہ ایک بار خود زمین پر اتر کر دیکھو، تب پتہ چلے گا انہیں، سب سمجھ آ جائے گا، سمجھے۔