کانگریس کے دو قدآور لیڈران ترون گگوئی اور احمد پٹیل کا 48 گھنٹوں کے اندر انتقال

نئی دہلی: بہار اسمبلی کے انتخابی نتائج کا اعلان ہونے کے بعد کانگریس کو پچھلے 48 گھنٹے میں دو بڑے صدمے لگے ہیں۔ کورونا وائرس نے کانگریس پارٹی کے دو قدآور رہنماؤں آسام کے سابق وزیراعلی ترون گگوئی اور پارٹی کے سینئر لیڈر احمد پٹیل کو چھین لیا۔ آسام کے تین بار وزیراعلی رہے گگوئی کا 85 سال کی عمر میں انتقال ہوگیا تھا جبکہ 71 سالہ احمد پٹیل بدھ کی صبح کورونا سے جنگ ہار گئے۔

گگوئی شمال مشرق میں کانگریس کے سربراہ رہنما تھے تو وزیر اعظم نریندر مودی کی آبائی ریاست گجرات میں احمد پٹیل پارٹی کی پہچان تھے۔ دونوں رہنماؤں کا شمار کانگریس کے سب سے بھروسے مند ساتھی کے طور پر ہوتی تھی اور دونوں ہی گاندھی خاندان کے قریبی اور بھروسے مند رہنما تھے۔

آسام میں اگلے سال اسمبلی انتخابات ہونے ہیں۔ ایسے میں گگوئی کا جانا پارٹی کے لئے بڑا جھٹکا مانا جا رہا ہے۔ سیاست میں قریب پانچ دہائی تک سرگرم رہے گگوئی سابق وزیر اعظم آنجہانی اندرا گاندھی کی حکومت میں 1971 میں پہلی بار پارلیمنٹ پہنچے اور پھر سیاسی سیڑھیاں چڑھتے چلے گئے۔ انہوں نے اندرا گاندھی، راجیو گاندھی،سونیا گاندھی اور اب راہل گاندھی کے ساتھ کام کیا۔

وہیں، تین بار لوک سبھا اور چار مرتبہ راجیہ سبھا رکن پارلیمنٹ رہے احمد پٹیل لمبے وقت سے حالیہ پارٹی کی صدر سونیا گاندھی کے سیاسی مشیر تھے اور فی الحال کانگریس کے خزانچی بھی تھے۔ راجیو گاندھی کے قتل کے بعد جب سونیا گاندھی نے پارٹی کی باگڈور سنبھالی، اس کے بعد سے آخری وقت تک احمد پٹیل ان کے (سونیا گاندھی) سب سے بھروسے مند رہے اور پارٹی کو کسی بھی پریشانی سے نکالنے میں اہم کردار ادا کیا۔