سدیکشا بھاٹی معاملہ میں دو ملزمان گرفتار، موٹرسائیکل میں ترمیم کرانے کا انکشاف

بلند شہر: اتر پردیش کے بلند شہر میں طالبہ سدیکشا بھاٹی کی سڑک حادثہ میں ہوئی موت کے معاملہ میں پولیس نے اہم انکشاف کرتے ہوئے دو ملزمان دیپک سولنکی اور راجو کو گرفتار کر لیا ہے۔ پولیس کا کہنا ہے کہ لڑکی کی موت حادثہ کے دوران واقع ہوئی۔ وہیں سدیکشا کے والد جتندر بھاٹی نے کہا کہ موٹر سائیکل سے دو افراد سدیکشا اور اس کے چچا کا تعاقب کر رہے تھے۔

معاملہ میں پہلے روز سے ہی سرگرم پولیس نے علاقہ کی تمام بلٹ موٹر سائیکلوں کی جانچ شروع کر دی تھی۔ بتایا جاتا ہے کہ پولیس 10 ہزار سے زیادہ موٹر سائیکلوں کی جانچ کر چکی ہے۔ چانچ میں پایا گیا ہے کہ علاقہ کی ایک موٹر سائیکل کو واقعہ کے بعد نہ صرف موڈی فائی (ترمیم) کیا گیا ہے بلکہ اس پر پھر سے رنگ و روغن بھی کرایا گیا ہے۔

ترمیم شدہ موٹر سائیکل کے مالک نے اس بات سے انکار کیا ہے کہ انہوں نے سدیکشا کا راستہ روکا تھا تاہم انہوں اس بات کا اعتراف کیا ہے کہ حادثہ کے وقت وہ موقع پر موجود تھے۔ انہوں نے کہا کہ حادثہ مخالف سمت سے آ رہے ایک ٹرک کی وجہ سے پیش آیا تھا۔ ایس ایس پی سنتوش سنگھ نے کہا کہ اس معاملہ کی تفصیلات میں تبدیلی کی جائے گی اور اب یہ معاملہ چھیڑ خانی کا نہیں رہا۔

خیال رہے کہ گریٹر نوئیڈا کی رہائشی سدیشا بھاٹی امریکہ کی یونیورسٹی میں زیر تعلیم تھی اور لاک ڈاؤں کورونا کی وجہ سے پیدا شدہ حالات کے درمیان جون کے مہینے میں ہی وہ امریکہ سے واپس لوٹی تھی۔ سدیکشا بڑھنے میں ہوشیار تھی اور امریکی یونیورسٹی کی طرف سے اسے پونے چار کروڑ روپے کی اسکالرشپ حاصل ہوئی تھی۔