بدلنے والی ہے نئی دہلی ریلوے اسٹیشن کی شکل، ڈیزائن دیکھ کر رہ جائیں گے حیران

نئی دہلی ریلوے اسٹیشن کی شکل پوری طرح سے بدلنے والی ہے۔ ریل ڈیولپمنٹ اتھارٹی آف انڈیا (آر ایل ڈی اے) نے نئی دہلی ریلوے اسٹیشن کا نیا ڈیزائن گزشتہ دنوں جاری کیا تھا جس میں لوگوں کے سامنے چار ماڈل تصویریں پیش کی گئی تھیں۔ لیکن اب مرکزی وزیر ریل پیوش گویل نے اپنے ٹوئٹر ہینڈل سے تین نئی تصویریں شیئر کرتے ہوئے بتایا ہے کہ آنے والے دنوں میں نئی دہلی ریلوے اسٹیشن کی شکل و شباہت کیا ہوگی۔ 14 جنوری کو پیوش گویل کے ذریعہ پیش کردہ ڈیزائن آر ایل ڈی اے سے کچھ مختلف نظر آ رہا ہے۔

دراصل آر ایل ڈی اے نئی دہلی ریلوے اسٹیشن اور اس کے آس پاس کی 88 ایکڑ زمین کا بالکل نئے اور جدید طریقے سے ڈیولپمنٹ کرنے والا ہے جس کا کام فی الحال شروع نہیں ہوا ہے۔ یہ پروجیکٹ ابھی انتہائی شروعاتی مرحلے میں ہے۔ بڈنگ کا عمل بھی ختم نہیں ہوا ہے، اس لیے امکان ظاہر کیا جا رہا ہے کہ آر ایل ڈی اے اور پیوش گویل کے ذریعہ جاری کردہ ماڈل میں سے کسی ایک کو حتمی شکل دی جائے گی۔

قابل غور بات یہ ہے کہ آر ایل ڈی اے اور پیوش گویل دونوں کے ذریعہ ہی پیش کیے گئے ماڈل انتہائی خوبصورت اور حیران کرنے والے ہیں۔ دونوں ماڈل میں بنیادی سہولیات یکساں ہوں گی اور اس کا خاکہ آر ایل ڈی اے نے تیار کر لیا ہے۔ وزیر ریل نے نئی دہلی ریلوے اسٹیشن کے جس ماڈل کی تین تصویریں ٹوئٹ کی ہیں، اسی ماڈل کے فائنل ہونے کے امکانات زیادہ نظر آ رہے ہیں۔ پیوش گویل کی پیش کردہ ایک تصویر میں نئی دہلی ریلوے اسٹیشن کے اندر کا نظارہ دکھائی دے رہا ہے جو کہ انتہائی عالی شان ہے۔ آپ بھی دیکھیں پیوش گویل کے ذریعہ جاری کردہ تینوں تصویریں...