نہیں تھم رہا دھمکیوں کا سلسلہ، آج بھی 25 سے زائد پروازوں کو بم سے اڑانے کی ملی دھمکی، سیکورٹی سخت

طیاروں کو بم سے اڑانے کی دھمکیاں تھمنے کا نام نہیں لے رہی ہیں۔ جمعہ کے روز بھی 25 سے زائد پروازوں میں بم دھماکہ کی دھمکی ملی، حالانکہ اب تک کسی بھی طیارہ میں دھماکہ خیز مادہ نہیں ملا ہے۔ یعنی افواہ پھیلانے کا سلسلہ روزانہ جاری ہے جس سے مسافروں کے ساتھ ساتھ ایئرلائنس ملازمین کو بھی پریشانیوں کا سامنا کرنا پڑ رہا ہے۔ آج انڈیگو، وستارا، اسپائس جیٹ کی 7-7 اور ایئر انڈیا کی 6 پروازوں میں دھماکہ کرنے کی خبر ملی تھی جو افواہ ثابت ہوئی ہے۔

انڈیگو ایئرلائنس کی جن پروازوں کو بم سے اڑانے کی دھمکی ملی ہے، ان میں 6ای11 (دہلی-استنبول)، 6ای58 (جدہ-ممبئی)، 6ای17 (ممبئی-استنبول)، 6ای108 (حیدر آباد-چنڈی گڑھ)، 6ای133 (پونے-جودھ پور)، 6ای87 (کوزیکوڈ-دمام) اور 6ای2099 (اودے پور-دہلی) شامل ہیں۔

تازہ دھمکیوں کے بعد ایئرلائنس نے پریس کو جاری ایک بیان میں کہا کہ ہمارے سخت سیکورٹی پروٹوکول کے مطابق سبھی ضروری ترکیبیں کی جا رہی ہیں اور ہم متعلقہ افسران کے ساتھ مل کر کام کر رہے ہیں۔ ہمارے صارفین اور ملازمین کی سیکورٹی ہماری اعلیٰ ترجیحات میں شامل ہے۔ اس وقت کسی بھی عدم سہولت کے لیے بے حد افسوس ہے اور صارفین کی سمجھداری قابل تعریف ہے۔

قابل ذکر ہے کہ 24 اکتوبر کو 85 سے زائد پروازوں کو بم سے اڑانے کی دھمکیاں ملی تھیں اور سبھی افواہ ثابت ہوئی تھیں۔ ان میں ایئر انڈیا کی 20 پروازیں، انڈیگو کی 20 پروازیں، وستارا کی 20 پروازیں اور اکاسا کی 25 پروازیں شامل تھیں۔ گزشتہ دو ہفتوں میں اس طرح کی تقریباً 250 دھمکیاں مل چکی ہیں۔ ان میں بیشتر دھمکیاں سوشل میڈیا کے ذریعہ دی گئی ہیں۔ یہی وجہ ہے کہ حکومت نے میٹا اور ایکس سے کہا ہے کہ اس معاملے میں وہ ضروری تعاون کریں۔