وقف ترمیمی بل 2024 پر تشکیل شدہ جے پی سی کی سربراہی بی جے پی کے رکن پارلیمنٹ جگدمبکا پال کریں گے

نئی دہلی: بی جے پی سے لوک سبھا کے رکن پارلیمنٹ جگدمبکا پال 'وقف (ترمیمی) بل 2024‘ پر تفصیل سے غور کرنے کے لیے تشکیل دی گئی جے پی سی (مشترکہ پارلیمانی کمیٹی) کی سربراہی کریں گے۔ پال کو 31 ارکان پارلیمنٹ پر مشتمل جے پی سی کا چیئرمین مقرر کیا گیا ہے۔

خیال رہے کہ مرکزی اقلیتی اور پارلیمانی امور کے وزیر کرن رجیجو نے حال ہی میں ختم ہونے والے پارلیمنٹ کے اجلاس کے دوران وقف قانون میں تبدیلی لانے کے لیے لوک سبھا میں 'وقف (ترمیمی) بل-2024' پیش کیا تھا۔ اپوزیشن جماعتوں اور این ڈی اے اتحاد میں شامل ٹی ڈی پی کے مطالبے کو قبول کرتے ہوئے حکومت نے اس بل کو جے پی سی کے سامنے بھیج دیا تھا۔

کرن رجیجو نے ایوان میں اس بل کو جے پی سی کو بھیجنے کی تجویز پیش کی تھی۔ اس 31 رکنی جے پی سی میں مختلف سیاسی جماعتوں سے تعلق رکھنے والے 21 لوک سبھا ارکان پارلیمنٹ اور 10 راجیہ سبھا ارکان کو شامل کیا گیا ہے۔

جے پی سی میں لوک سبھا سے جگدمبکا پال، نشی کانت دوبے، تیجسوی سوریا، اپراجیتا سارنگی، سنجے جیسوال، دلیپ سائکیا، ابھیجیت گنگوپادھیائے، ڈی کے ارونا، گورو گگوئی، عمران مسعود، محمد جاوید، مولانا محب اللہ، کلیان بنرجی، اے راجا، لاو سری کرشنا دیورایالو، دلیشور کامت، اروند ساونت، ایم سریش گوپی ناتھ، نریش گنپت مہاسکے، ارون بھارتی اور اسد الدین اویسی کو شامل کیا گیا ہے۔

وہیں، راجیہ سبھا سے برج لال، میدھا وشرام کلکرنی، غلام علی، رادھا موہن داس اگروال، سید نصیر حسین، محمد ندیم الحق، وی وجے سائی ریڈی، ایم محمد عبداللہ، سنجے سنگھ اور ڈی ویریندر ہیگڑے کو جے پی سی میں جگہ دی گئی ہے۔

اس بل پر غور کرنے کے بعد جے پی سی سے کہا گیا ہے کہ وہ پارلیمنٹ کے اگلے اجلاس کے پہلے ہفتے کے آخری دن اپنی رپورٹ پیش کرے۔