بمقصد حج کیرالہ سے پیدل مکہ کی طرف بڑھ رہے شہاب چتور کا قدم پاکستان نے روکا، پنجاب کے شاہی امام کا شدید رد عمل

شہاب چتور کا نام گزشتہ کچھ دنوں سے خوب موضوعِ بحث بنا ہوا ہے۔ اس کی وجہ یہ ہے کہ انھوں نے حج کے مقصد سے پیدل کیرالہ سے سفر شروع کیا اور پرعزم ہو کر مکہ کی جانب بڑھتے نظر آ رہے ہیں۔ لیکن اب ایسی خبریں سامنے آ رہی ہیں کہ پاکستان کے شہاب چتور کے قدم کو روک دیا ہے۔ یہ خبر نہ صرف افسوسناک ہے، بلکہ حیرت انگیز بھی ہے۔ ایسا اس لیے کیونکہ دہلی واقع پاکستانی سفارت خانہ نے شہاب سے وعدہ کیا تھا کہ انھیں ویزا مل جائے گا۔ لیکن اب جبکہ وہ واگھہ سرحد پر پہنچ گئے ہیں تو انھیں ویزا نہیں دیا جا رہا۔

اس سلسلے میں 2 اکتوبر کو مجلس احرار اسلام کے دفتر میں شاہی امام پنجاب مولانا محمد عثمان رحمانی لدھیانوی نے ایک پریس کانفرنس کی۔ اس میں انھوں نے بتایا کہ کیرالہ سے مکہ پیدل حج کے لیے جا رہے شہاب چتور کو پاکستانی حکومت نے اپنے ملک سے گزرنے کی اجازت دینے سے منع کر دیا ہے۔ انھوں نے کہا کہ ’’شہاب ان دنوں پنجاب سے گزر رہے ہیں تو ان سے کئی بار ملاقات ہوئی۔ یہ بات سامنے آئی ہے کہ دہلی واقع پاکستانی سفارتخانہ نے پیدل حج کرنے جا رہے مسافر کو دھوکہ دیا ہے۔‘‘

دراصل پاکستان کے دہلی واقع سفارتخانہ نے پہلے تو شہاب چتور کو یقین دلایا تھا کہ آپ پیدل حج سفر شروع کر دیجیے، جب آپ ہندوستان-پاکستان سرحد کے قریب پہنچو گے تو آپ کو پاکستان کا ویزا دیا جائے گا۔ اُس وقت پاکستانی سفارتخانہ نے یہ دلیل دی تھی کہ پہلے ویزا دینے سے اس کی مدت ختم ہو جائے گی۔ اس لیے سرحد پر پہنچتے ہی شہاب چتور کو ویزا دے دیا جائے گا۔

شاہی امام پنجاب کا کہنا ہے کہ جب شہاب چتور تقریباً تین ہزار کلومیٹر پیدل سفر کر کے واگھہ بارڈر کے قریب پہنچ گئے ہیں تو پاکستانی حکومت نے اپنی عادت کے مطابق اب ویزا دینے سے صاف انکار کر دیا ہے۔ پاکستان کے افسروں کے اس رویہ سے حیرت ہے۔ حالانکہ دھوکہ دینا پاکستان کی پرانی عادت ہے۔ شاہی امام نے کہا کہ ہندوستان کے مسلمانوں نے کبھی پاکستان حکومت سے کچھ نہیں چاہا۔ 75 سالوں میں پہلی بار ایک ہندوستانی مسلمان پیدل حج کے لیے جب مکہ شریف جا رہا ہے تو پاکستان اس کو اپنی زمین سے گزرنے بھی نہیں دینا چاہتا۔

شاہی امام مولانا محمد عثمان رحمانی لدھیانوی کا کہنا ہے کہ صرف اس لیے پاکستان کی حکومت شہاب چتور کو ٹرانزٹ ویزا نہیں دے رہی ہے کیونکہ وہ ایک ہندوستانی مسلمان ہے۔ انھوں نے کہا کہ ’’پاکستان کو شرم آنی چاہیے۔ دنیا بھر میں اسلام کے نام پر ڈھنڈورا پیٹنے والا ملک شہاب چتور کے سفر حج کی راہ میں روڑے اٹکا رہا ہے۔‘‘ مولانا عثمان رحمانی نے بتایا کہ اس سلسلے میں انھوں نے وزیر اعظم نریندر مودی کو ای میل کے ذریعہ خط لکھ دیا ہے اور یہ مطالبہ کیا ہے کہ پاکستان کی جگہ چین کے راستے مکہ جانے کے لیے حکومت ہند شہاب چتور کی مدد کرے، تاکہ پوری دنیا کے اسلامی ممالک کے سامنے پاکستان کا دوغلا چہرہ بے نقاب ہو سکے۔