ریتا بہوگنا جوشی کے بیٹے نے بی جے پی کو جھٹکا دے ہی دیا، سماجوادی پارٹی میں شامل

بی جے پی رکن پارلیمنٹ ریتا بہوگنا جوشی نے بہت کوشش کی کہ پارٹی ان کے بیٹے کو اسمبلی انتخاب میں ٹکٹ دے، لیکن ان کی ہر کوشش ناکام ہوگئی۔ اس کے بعد کچھ ایسے اشارے ملے تھے کہ ان کا بیٹا مینک جوشی پارٹی سے بغاوت کر سکتا ہے، اور وہی ہوا بھی۔ آج مینک جوشی نے بی جے پی کو جھٹکا دیتے ہوئے سماجوادی پارٹی کی رکنیت حاصل کر لی۔ مینک نے سماجوادی پارٹی صدر اکھلیش یادو کی موجودگی میں اعظم گڑھ کے گوپال پور اسمبلی کے جلسہ عام میں پارٹی کی رکنیت اختیار کی۔

دلچسپ بات یہ ہے کہ انتخاب سے ٹھیک پہلے بی جے پی چھوڑ کر سماجوادی پارٹی کا دامن تھامنے والے سوامی پرساد موریہ کی بیٹی سنگھ مترا موریہ بدایوں سے بی جے پی رکن پارلیمنٹ ہیں۔ اب ریتا بہوگنا جوشی کے سماجوادی پارٹی میں شامل ہونے کے بعد ایسا نظارہ بن گیا ہے کہ ماں بی جے پی اور بیٹا سماجوادی پارٹی میں۔ ویسے مینک جوشی نے گزشتہ 22 فروری کو ہی سماجوادی پارٹی میں شامل ہونے کا اشارہ دے دیا تھا۔ اس دن مینک جوشی نے اکھلیش یادو سے ملاقات کی تھی اور اس کی تصویر خود اکھلیش یادو نے اپنے سوشل میڈیا ہینڈل پر شیئر بھی کی تھی۔