سورج کی تپش سے جل رہے دہلی کے باشندے، محکمہ تعلیم نے سبھی پرائیویٹ اسکولوں کو بند کرنے کا دیا حکم

دہلی میں ان دنوں سورج کی تپش سے عوام پریشان ہیں۔ دن کے وقت لو کے تھپیڑوں نے سبھی کو بے حال کر رکھا ہے۔ درجہ حرارت 47 ڈگری سلسیس کے پار پہنچ رہا ہے۔ جھلسانے والی اس گرمی کو دیکھتے ہوئے دہلی کے پرائیویٹ اسکولوں کو فوری اثر سے بند کر دیا گیا ہے۔

پیر کی شام دہلی کے محکمہ تعلیم نے سبھی پرائیویٹ اسکولوں کو بند کیے جانے کا حکم صادر کر دیا۔ شدید گرمی کو دیکھتے ہوئے اس سال مجموعی طور پر پچاس دنوں کے لیے اسکولوں میں چھٹی کا اعلان کیا گیا ہے جو کہ گرمی کی چھٹی کا ہی حصہ ہے۔ محکمہ تعلیم نے سرکلر جاری کرتے ہوئے بتایا کہ دہلی کے سرکاری اسکول گیارہ مئی کے بعد سے بند ہیں، لیکن شدید گرمی کے درمیان پرائیویٹ اسکول کھلے ہوئے ہیں۔ انھیں فوراً ہی بند کیا جائے۔ محکمہ تعلیم نے دہلی کے سبھی پرائیویٹ اسکولوں کو ’گرمی کی چھٹی‘ کے تحت بند کیے جانے کا حکم دیا ہے۔ دہلی کے سرکاری اسکول میں گرمی کی چھٹی گیارہ مئی سے تیس جون تک کے لیے مقرر ہے۔

واضح رہے کہ محکمہ موسمیات نے اس بار راجدھانی دہلی میں گزشتہ سال کے مقابلے زیادہ گرمی پڑنے کا اندیشہ ظاہر کیا ہے۔ دہلی میں پیر کے روز اوسطاً درجہ حرارت زیادہ سے زیادہ 43 ڈگری سلسیس درج کیا گیا ہے جو کہ روزانہ بڑھ رہا ہے۔ آنے والے دنوں میں یہ 45 ڈگری سلسیس پار رہنے کا اندیشہ ظاہر کیا گیا ہے۔ دن میں شدید لو چلنے کے امکان کے ساتھ ہی ریڈ الرٹ بھی جاری کیا گیا ہے۔