کسان تحریک پر راہل گاندھی کا بیان آیا سامنے، مودی حکومت پر شدید حملہ

کانگریس کے سابق صدر راہل گاندھی نے بدھ کے روز مرکز کی مودی حکومت کو کسان تحریک معاملے پر تنقید کا نشانہ بنایا۔ انھوں نے کہا کہ دھرنا کی جگہ پر کئی لوگوں کی موت کے باوجود کسان تین زرعی قوانین کی مخالفت کر رہے ہیں، لیکن حکومت ان پر ذرا بھی توجہ نہیں دے رہی ہے۔

راہل گاندھی نے اپنے ایک ٹوئٹ میں لکھا ہے کہ ’’اپنے کھیتوں اور ملک کی حفاظت کے لیے کسان دھیرے دھیرے مر رہے ہیں۔ لیکن وہ ڈرتے نہیں ہیں اور اپنے رخ کے تئیں سچے ہیں۔‘‘ تین نئے زرعی قوانین کے خلاف مظاہرہ کر رہے 500 سے زائد کسانوں کی اب تک موت ہو چکی ہے، اور اس کو مدنظر رکھتے ہوئے راہل گاندھی نے اپنے ٹوئٹ میں 500 ڈیتھ ایٹ فارمرس پروٹیسٹ ہیش ٹیگ بھی لگایا ہے۔

واضح رہے کہ پنجاب، ہریانہ اور مغربی اتر پردیش کے سینکڑوں کسان گزشتہ سال 26 نومبر سے قومی راجدھانی کے کئی سرحدوں پر تین زرعی قوانین کی مخالفت کر رہے ہیں۔ گزشتہ 6 مہینوں میں مظاہروں کے مقام پر 500 سے زائد کسان اپنی جان گنوا چکے ہیں۔ کسان تینوں زرعی متنازعہ قوانین کو واپس لینے اور اپنی پیداوار کی کم از کم حمایتی قیمت (ایم ایس پی) یقینی کرنے کا مطالبہ کر رہے ہیں۔