ہندوستانی اولمپک دستہ کے 117 کھلاڑیوں سے ملاقات کریں گے وزیراعظم نریندر مودی

15 اگست 2024 کو جشن آزادی کے موقع پر وزیراعظم نریندر مودی پیرس اولمپک-2024 میں شرکت کرنے والے 117 کھلاڑیوں پر مشتمل ہندوستانی دستے سے ملاقات کریں گے۔ ہندوستانی ٹیم کو یوم آزادی تقریب میں شرکت کے لیے بھی مدعو کیا گیا تھا جبکہ پورے دستے کو وزیراعظم رہائش پر آنے کے لیے دعوت دی گئی ہے۔ اس سلسلے میں تمغہ جیتنے والے فاتحین کو بھی خصوصی طور پر مدعوکیا گیا ہے۔

وزیراعظم نریندر مودی لال قلعہ پر تقریر ختم کرنے کے بعد اپنی رہائش پر سبھی اولمپک کھلاڑیوں سے ملاقات کرنے والے ہیں۔ 12 بجے کے بعد ہونے والی اس ملاقات میں وزیراعظم  سبھی ہندوستانی اولمپک کھلاڑیوں کے ساتھ چائے کی چسکی کے ساتھ لنچ بھی کرسکتے ہیں۔ اس درمیان مودی اور کھلاڑیوں میں اولمپک کے سنہرے اور مشکل لمحات پر بات چیت دیکھنے کو مل سکتی ہے۔ واضح ہو کہ پچھلی بار ٹوکیو اولمپک کے بعد بھی وزیراعظم نریندر مودی نے کھلاڑیوں سے ملاقات کی تھی اور ان کی تصویریں خوب وائرل ہوئی تھیں جس میں وہ گولڈ میڈلسٹ نیرج چوپڑہ سے جیولن گھرو کے گُر سیکھ رہے تھے اور سبھی لوگوں کے ساتھ خوشی کا اظہار کر رہے تھے۔

واضح ہو کہ پیرس اولمپکس 2024 میں ہندوستان کے لیے تمغہ جیتنے والے کھلاڑیوں کو وزیراعظم مودی پہلے سوشل میڈیا پر اور پھرخود سے بات کرکے مبارکباد دے چکے ہیں۔ اس سلسلے میں ان کے ذریعہ پی آر شری جیش کے ساتھ ان کی بات چیت کافی وائرل ہوئی تھی۔ اس سے قبل 2020 میں جب ٹوکیو اولمپک کا انعقاد ہوا تھا، تب وزیراعظم نے کووڈ وبا کی وجہ سے اگلے سال 2021 میں پورے اولمپک دستہ سے ملاقات کی تھی اور ان کھلاڑیوں کے ساتھ لنچ بھی کیا تھا۔