ون ڈسٹرکٹ، ون میڈیکل کالج کی پالیسی پر تیزی سے کام جاری: یوگی آدتیہ ناتھ

سدھار تھ نگر: اترپردیش کے وزیر اعلی یوگی آدتیہ ناتھ نے اتوار کو کہا کہ حکومت شہریوں کی طبی سہولیت کے لئے کمر بستہ ہے اور طبی سہولیات کو مزید مضبوط کرنے کی کوشش کے تحت ون ڈسٹرکٹ ون میڈیکل کالج کی پالیسی پر تیزی سے کام کر رہی ہے۔

سی ایم یوگی نے یہاں اسٹیٹ میڈیکل کالج کا جائزہ لینے کے بعد میڈیا نمائندوں سے بات چیت میں کہا کہ حکومت ون ڈسٹرکٹ ون میڈیکل کالج کی پالیسی پر تیزی سے کام کر رہی ہے۔ ریاستی حکومت کے پانچ سال پورے ہونے تک سبھی اضلاع میں میڈیکل کالج قائم کیے جائیں گے۔ سدھارتھ نگر میں اکتوبر تک میڈیکل کالج شروع ہوجائے گا۔ 300 بستر تیار ہیں اور 100 طلبہ کی پڑھائی شروع ہوگی۔

انہوں نے کہا کہ ریاست کے نو اضلاع میں نوتعمیر شدہ میڈیکل کالجوں کا افتتاح یہیں سے ہوگا۔ وزیر اعظم نریندر مودی 30 جولائی کو سدھارتھ نگر سے ان نئے میڈیکل کالجوں کا افتتاح ایک ساتھ کریں گے۔ دیوریا، ایٹہ، فتح پور، غازی پور، ہردوئی، جونپور، مرزاپور، پرتاپ گڑھ، سدھا رتھ نگر میں نئے میڈیکل کالجوں کا افتتاح مودی کریں گے۔ مادھو بابو کے نام سے یہاں کا میڈیکل کالج ہوگا۔ دیگر اضلاع کے میڈیکل کالجوں کے نئے نام رکھے گئے ہیں۔