این ایس یو آئی نے دہلی یونیورسٹی میں غیر جانبدار اور شفاف انتخاب کرانے کا کیا مطالبہ، وائس چانسلر کو لکھا خط

نیشنل اسٹوڈنٹس یونین آف انڈیا (این ایس یو آئی) نے آج ایک پریس کانفرنس منعقد کر دہلی یونیورسٹی انتظامیہ اور دہلی پولیس سے اسٹوڈنٹس یونین انتخاب میں غیر جانبداری اور شفافیت یقینی بنانے کی اپیل کی۔ این ایس یو آئی کے قومی صدر ورون چودھری نے آئندہ انتخابات میں جیت کا بھروسہ ظاہر کرتے ہوئے کہا کہ ’’ہمیں پورا یقین ہے کہ ہم اس انتخاب کو 0-4 سے جیتیں گے۔‘‘ اس دوران انھوں نے انتخاب کو لے کر اے بی وی پی کی سرگرمیوں کو ہدف تنقید بھی بنایا۔

پریس کانفرنس کے دوران ورون چودھری نے اے بی وی پی اور آر ایس ایس سے جڑے اراکین کی انتخابی افسران کی شکل میں تقرری پر سوال اٹھائے۔ انھوں نے یونیورسٹی انتظامیہ اور مقامی افسران سے غیر جانبدارانہ رویہ اختیار کرنے کی اپیل کی۔ انھوں نے کہا کہ ’’میں دہلی یونیورسٹی انتظامیہ سے اپیل کرتا ہوں کہ انتخابی عمل غیر جانبدار ہونا چاہیے۔ ہم نے دیکھا ہے کہ کئی آر ایس ایس-بی جے پی سے منسلک پروفیسر انتخابات کو متاثر کرنے کی کوشش کر رہے ہیں۔‘‘

ورون چودھری کا کہنا ہے کہ اے بی وی پی نے انتخابی اصولوں کی خلاف ورزی کی ہے۔ کالج احاطہ میں پارٹیوں کا انعقاد کیا جا رہا ہے اور اس میں یونیورسٹی انتظامیہ کی خاموش منظوری شامل ہے۔ یہ بی جے پی-اے بی وی پی کا گٹھ جوڑ جواب دہ ہونا چاہیے۔ انتخابی عمل کی غیر جانبداری برقرار رکھنے کے لیے آر ایس ایس اور بی جے پی سے جڑے پروفیسرز کو انتخابی ڈیوٹی سے ہٹایا جانا چاہیے۔

پریس کانفرنس کے بعد این ایس یو آئی دہلی کے صدر آشیش لامبا نے دہلی یونیورسٹی وائس چانسلر کو ایک میمورنڈم پیش کیا جس میں این ایس یو آئی کے کچھ اہم مطالبات کا تذکرہ کیا گیا ہے۔ اس میں طلبا یونین انتخاب کو غیر جانبدارانہ اور شفاف بنانے کی بات بھی کہی گئی ہے اور اے بی وی پی کی قابل اعتراض سرگرمیوں کا بھی تذکرہ کیا گیا ہے۔ بہرحال، این ایس یو آئی نے امید ظاہر کی ہے کہ سبھی طلبا انتخابی ایمانداری کے لیے ان کی مہم کی حمایت کریں گے اور دہلی یونیورسٹی میں جمہوریت کو کمزور کرنے کی کسی بھی کوشش کے خلاف کھڑے ہوں گے۔