کورونا کے نئے ویرئنٹ سے گھبرانے کی ضرورت نہیں: ستیندر جین

نئی دہلی: دہلی کے وزیر صحت ستیندر جین نے پیر کو کہا کہ کورونا انفیکشن کے نئے ویرئنٹ ایکس ای سے گھبرانے کی ضرورت نہیں ہے کیونکہ اس ویرئنٹ کو عالمی ادارہ صحت (ڈبلیو ایچ او) کی طرف سے ویرئنٹ آف کنسرن کی لسٹ میں شامل نہیں کیا گیا ہے۔

دہلی میں کورونا کے معاملات کے بارے میں معلومات دیتے ہوئے ستیندر جین نے کہا، ’’ہم دہلی میں کووڈ-19 کی صورتحال پر گہری نظر رکھے ہوئے ہیں۔ فی الحال، انفیکشن کی شرح پر توجہ دینے کی ضرورت نہیں ہے، کیونکہ اسپتالوں میں داخل ہونے والوں کی تعداد دن بہ دن کم ہو رہی ہے۔ اس وقت اسپتالوں میں کورونا کے صرف 49 مریض داخل ہیں۔ کورونا کے مریضوں کی تعداد متوازن اور قابو میں ہے۔‘‘

گجرات میں پائے جانے والے کورونا کے ایکس ای ویرینٹ کے بارے میں انہوں نے کہا کہ کووڈ- 19 کے نئے ویرینٹ سے گھبرانے کی ضرورت نہیں ہے۔ ایکس ای ویریئنٹ کو ڈبلیو ایچ او کی طرف سے 'ویریئنٹس آف کنسرن' کی فہرست میں شامل نہیں کیا گیا ہے۔ اس وقت تک پریشان ہونے کی قطعی ضرورت نہیں ہے جب تک کہ تشویش کی کوئی قسم سامنے نہ آجائے۔ دنیا بھر میں ہر روز کوئی نہ کوئی نیا ویریئنٹ آرہا ہے۔

ستیندر جین نے کہا کہ ہمیں کورونا کے نئے ویریئنٹس کے ساتھ جینا سیکھنا ہے، یہ ویریئنٹس آگے آتے رہیں گے۔ تاہم، ہمیں اب بھی کورونا کے قوانین پر عمل کرنے کی ضرورت ہے۔ انہوں نے کہا کہ دہلی حکومت کی طرف سے کورونا کو روکنے کے لیے تمام ضروری اقدامات کیے جا رہے ہیں۔

ستیندر جین نے کہا کہ اسپتال میں داخل مریضوں کی تعداد اتنی کم ہے کہ بستروں کو بڑھانے کی ضرورت محسوس نہیں کی جاتی ہے۔ دہلی میں صحت کا موجودہ نظام ٹھیک ہے۔ حکومت آنے والی سنگین صورتحال سے نمٹنے کے لیے پوری طرح تیار ہے۔ دہلی حکومت نے حال ہی میں سات نئے اسپتالوں کی تعمیر کا کام شروع کیا ہے، جو آنے والے چند مہینوں میں تیار ہو جائیں گے۔ ان نئے اسپتالوں کے بننے سے دہلی میں تقریباً سات ہزار مزید بستروں کا اضافہ ہوگا۔ انہوں نے کہا کہ دہلی حکومت جلد ہی سرکاری اسپتالوں میں لوگوں کو مفت احتیاطی خوراک فراہم کرے گی۔ جو ویکسین پہلی اور دوسری خوراک میں دی گئی تھی، اسی ویکسین کی احتیاطی خوراک لگائی جائے گی۔

لوگوں کو کورونا سے متعلق قوانین پر عمل کرنے کی تلقین کرتے ہوئے وزیر صحت نے کہا کہ کورونا کے پھیلاؤ کو روکنے کا واحد طریقہ ہمیشہ احتیاطی تدابیر اختیار کرنا ہے۔ انہوں نے تمام لوگوں سے درخواست کی کہ وہ حفاظت کے لیے ماسک پہنیں اور عوامی مقامات پر جاتے وقت سماجی دوری پر عمل کریں۔ انہوں نے کہا کہ جب بھی اپنے گھر سے باہر نکلیں تو ماسک پہنیں اور کووڈ سے متعلق تمام پروٹوکول پر ہر وقت عمل کریں، تاکہ کورونا کو پھیلنے سے روکا جاسکے۔