شرد پوار نے اپنی پارٹی کو دیا نیا نام ’این سی پی- شرد چندر پوار‘، الیکشن کمیشن کی ملی منظوری

ممبئی: این سی پی شرد پوار گروپ کو الیکشن کمیشن کی جانب سے نیا نام مل گیا ہے۔ یہ نام ’نیشنلسٹ کانگریس پارٹی– شرد چندر پوار‘ ہے۔ الیکشن کمیشن کی جانب سے شرد پوار گروپ کو بدھ (7 فروری) کی شام 4 بجے تک تین نئے نام دینے کے لیے کہا گیا تھا، جس کے بعد شرد پوار گروپ نے تین نام دیے تھے، ان میں ’نیشنلسٹ کانگریس پارٹی- شرد چندر پوار‘ کو الیکشن کمیشن کی منظوری مل گئی ہے۔

الیکشن کمیشن نے شرد پوار گروپ سے نئے انتخابی نشان کے متعلق بھی تجویز پیش کرنے کے لیے کہا تھا، جس کے لے ’چائے کا کپ‘، ’سورج مکھی کا پھول‘ اور ’چڑھتا سورج‘ تجویز کیا گیا تھا لیکن انتخابی نشان کا فیصلہ فی الحال نہیں ہو سکا۔ اس بارے میں الیکشن کمیشن نے جلد فیصلہ لیے جانے کی بات کہی ہے۔ مذکورہ بالا ان انتخابی نشانوں کے علاوہ شرد پوار گروپ کی طرف سے ’برگد کا درخت‘ بھی پیش کیا گیا ہے۔

واضح رہے کہ الیکشن کمیشن کی جانب سے اجیت پوار گروپ کو اصل نیشنلسٹ کانگریس پارٹی (این سی پی) قرار دینے اور اس کا انتخابی نشان ’گھڑی‘ الاٹ کرنے کے بعد شرد پوار گروپ کو یہ نیا نام ملا ہے۔ شرد پوار گروپ نے الیکشن کمیشن کو جو 3 نام بھیجے تھے ان میں ’نیشنلسٹ کانگریس پارٹی شرد پوار‘، ’نیشنلسٹ کانگریس پارٹی شرد چندر پوار‘ اور ’نیشنلسٹ کانگریس پارٹی شرد راؤ پوار‘ شامل تھا۔ اسی کے ساتھ  انتخابی نشان کے طور پر ’چائے کا کپ‘، ’سورج مکھی  کا پھول‘ اور ’چڑھتا سورج‘ تجویز کیا تھا، لیکن انتخابی نشان کے الاٹ کا مسئلہ حل نہیں ہو سکا۔

بہرحال الیکشن کمیشن کے فیصلے پر ایک طرف اجیت پوار کے کیمپ میں جشن کا ماحول ہے تو دوسری طرف شرد پوار کا گروپ احتجاج کر رہا ہے۔ خبر رساں ایجنسی پی ٹی آئی کے مطابق بدھ کو پونے اور آس پاس کے علاقوں میں شرد پوار کے حامیوں نے سیاہ ربن باندھ کر الیکشن کمیشن کے فیصلے کے خلاف احتجاج کیا۔ قابل ذکر ہے کہ شرد پوار نے 1999 میں این سی پی کی بنیاد رکھی تھی۔ گزشتہ سال جولائی میں شرد پوار کے بھتیجے اجیت پوار نے پارٹی کے 8 ایم ایل ایز کے ساتھ ایکناتھ شندے کی قیادت والی حکومت میں شمولیت اختیار کرلی تھی۔