ہیمنت سورین کے ای ڈی ریمانڈ میں 5 دن کی توسیع، اب ریوینیو ملازم کے روبرو کی جائے گی پوچھ گچھ

رانچی: رانچی کی پی ایم ایل اے ( انسداد منی لانڈرنگ قانون) کی عدالت نے جھارکھنڈ کے سابق وزیر اعلیٰ ہیمنت سورین کی ای ڈی ریمانڈ کی مدت میں پانچ دن کی توسیع کر دی ہے۔ ای ڈی 3 فروری سے مسلسل ان سے پوچھ گچھ کر رہی ہے۔ پہلے سے منظور شدہ ریمانڈ کی مدت پوری ہونے کے بعد سورین کو بدھ کی دوپہر 2.30 بجے عدالت میں پیش کیا گیا۔

رپورٹ کے مطابق، عدالت میں پیشی کے دوران جے ایم ایم کے کارکنان اور سورین کے حامیوں کی بڑی تعداد احاطے میں موجود تھی، جنہوں نے ہیمنت سورین زندہ باد کے نعرے لگائے۔ عدالت میں سورین کی پیشی کے دوران ای ڈی نے جج سے کہا، ’’سورین سے پوچھ تاچھ ابھی مکمل نہیں ہوئی ہے۔ انہوں نے سوالات کے تسلی بخش جوابات نہیں دیے، اس لیے ریمانڈ کی مدت میں مزید سات دن کی توسیع کی جائے۔‘‘ جس پر عدالت نے مزید پانچ روزہ ریمانڈ منظور کر لیا۔

خیال رہے کہ ای ڈی نے ہیمنت سورین کو رانچی کے باریاتو میں واقع ساڑھے آٹھ ایکڑ اراضی کے گھپلے کے الزام میں گرفتار کیا ہے۔ اس معاملے میں ریونیو ملازم بھانو پرتاپ کو بھی ریمانڈ پر لیا گیا ہے جو پہلے ہی جیل میں تھا۔ اب ایجنسی ان دونوں کو آمنے سامنے بٹھا کر پوچھ گچھ کرے گی۔ ریونیو کے اس ملازم نے ای ڈی کو دیے گئے اپنے بیان میں کہا ہے، ’’افسروں نے مجھے بتایا کہ باریاتو میں واقع زمین باس کی ہے۔ افسران کے حلقے میں باس کا مطلب ہیمنت سورین تھا۔‘‘

قابل ذکر ہے کہ اسمبلی میں اعتماد کے ووٹ پر بحث کے دوران ہیمنت سورین نے پیر کو چیلنجنگ انداز میں کہا تھا کہ اگر وہ ساڑھے آٹھ ایکڑ زمین سے متعلق کوئی کاغذ پیش کر سکتے ہیں جس کے لیے انہیں گرفتار کیا گیا ہے، تو وہ سیاست سے ریٹائر ہو جائیں گے اور جھارکھنڈ چھوڑ دیں گے۔