نریندر گری کیس: سی بی آئی باگھمبری مٹھ پہنچی، مہنت کے کمرے سے تین کروڑ روپے اور کثیر مقدار میں زیورات برآمد

مہنت نریندر گری خودکشی معاملے کی جانچ کر رہی سی بی آئی کی ٹیم جمعرات کو الاپور واقع باگھمبری مٹھ پہنچی۔ سی بی آئی ٹیم نے انتظامیہ افسران، پولیس، بینک افسران اور مٹھ کے سَنتوں کے سامنے مہنت کے کمرے کا سیل بند تالا کھولا۔ کمرے سے تقریباً تین کروڑ نقد، کروڑوں کے زیورات اور کروڑوں کی زمین کے کاغذات اور کارتوس بھی ملے۔ نقدی، زیورات اور زمین کے کاغذات کو نئے مہنت بلویر گری کو سونپ دیا گیا۔

باگھمبری مٹھ کے مہمان خانہ میں مہنت نریندر گری کی لاش 20 ستمبر 2021 کو پھندے پر لٹکا ملا تھا۔ اس معاملے میں سی بی آئی نے جانچ کی تھی۔ جانچ کے بعد سی بی آئی نے مہنت کا خواب گاہ سیل کر دیا تھا۔ نئے مہنت بلویر گری نے کمرے کا تالا کھولنے کے لیے کورٹ سے اپیل کی تھی۔ کورٹ کے حکم کے بعد سی بی آئی ٹیم جمعرات کو دن میں مٹھ پہنچی۔

اس دوران سی بی آئی ٹیم کے ساتھ اے سی ایم تھرڈ ابھینو قنوجیا، اے سی ایم چہارم گنیش کمار قنوجیا اور سی او چہارم راجیش یادو کے ساتھ ہی ایک بینک افسر بھی موجود رہے۔ سی بی آئی ٹیم نے سیل کرنے سے پہلے کمرے میں رکھے سامانوں کی فہرست تیار کی تھی۔ ٹیم نے سب سے پہلے اپنی فہرست کے مطابق کمرے میں ملی چیزوں کو ملایا۔ کمرے میں تقریباً تین کروڑ روپے نقدی کے علاوہ کروڑوں روپے کے زیورات اور کروڑوں کی زمین کے کاغذات بھی ملے۔ مہنت کی وصیت بھی کمرے میں تھی۔

نقدی گننے کے لیے بینک افسر کو بھی بلایا گیا تھا۔ زمین کے کاغذات کو جانچنے کے لیے سَب انسپکٹر کو بھی بعد میں بلایا گیا۔ سی بی آئی ٹیم دن بھر مٹھ میں ہی رہی۔ آخر میں سبھی نقدی، زیورات اور زمین کے کاغذات کو مہنت بلویر گری کے حوالے کر دیا۔ اس کے علاوہ نریندر گری کی مالا اور بازوبند کو بھی بلویر گری کو سونپا گیا۔

کمرے سے دیگر سامان کے علاوہ تقریباً 9 کوئنٹل دیسی گھی اور 13 کارتوس بھی ملے۔ کارتوسوں کو مقامی پولیس کو سونپ دیا گیا۔ سی بی آئی کی اس کارروائی میں دن بھر لگ گئے۔ کمرے کی چابی اور دیگر سامان مہنت بلویر گری کو سونپ کر سی بی آئی ٹیم تقریباً 8 بجے مٹھ سے روانہ ہوئی۔ اس دوران پورے واقعہ کی ویڈیو کی ریکارڈنگ کرائی گئی۔