نینی تال: دریا میں نہاتے وقت دو نوجوانوں کی ڈوبنے سے موت

نینی تال: اتراکھنڈ کے نینی تال ضلع میں دو الگ الگ واقعات میں ڈوب جانے سے دو نوجوانوں کی موت ہو گئی، جب کہ دو نوجوان لاپتہ بتائے جا رہے ہیں۔ پولیس دونوں کو تلاش کر رہی ہے۔ پہلا واقعہ نینی تال-رانی کھیت روڈ پر بھوجان کے نزدیک پیش آیا۔

بتایا جا رہا ہے کہ راجستھان کے رہنے والے روی کمار جو بھووالی کے ایئر فورس اسٹیشن میں ٹھیکے پر کام کر رہے تھے، اپنے ساتھی سنجے پانڈے اور دیگر پانچ ساتھیوں کے ساتھ رانی کھیت روڈ کے نزدیک کوسی ندی میں نہانے گئے تھے۔ اس دوران دونوں تیز بہاؤ کی زد میں آگئے۔ اس سے دیگر لوگوں میں ہلچل مچ گئی اور فوری طور پر پولیس کو اطلاع دی۔

پولیس افسر پرمود کمار ساہ نے بتایا کہ ریاستی ڈیزاسٹر مینجمنٹ فورس (ایس ڈی آر ایف) اور پولیس ٹیموں کو بھووالی سے موقع پر بھیجا گیا۔ دوسری جانب تھانہ رانی کھیت کی پولیس بھی موقع پر پہنچ گئی اور نوجوانوں کی تلاش شروع کر دی۔ کچھ دیر بعد روی کمار کی لاش برآمد ہوئی جبکہ سنجے پانڈے کی تلاش جاری ہے۔

دوسرا واقعہ ہلدوانی کے کاٹھ گودام پولیس اسٹیشن کے تحت گولا پار میں پیش آیا۔ کاٹھ گودام پولیس اسٹیشن کے انچارج پرمود پاٹھک نے بتایا کہ ہلدوانی کے رہنے والے یوراج جوشی اور سدھیر گوڑ گاؤلا ندی میں نہاتے ہوئے گہرے پانی میں اتر گئے اور دونوں لاپتہ ہوگئے۔ فوری طور پر ہلدوانی کاٹھ گودام پولیس موقع پر پہنچ گئی اور ریسکیو آپریشن شروع کر دیا گیا۔ کچھ دیر بعد یوراج جوشی کو تلاش کرکے اسپتال بھیجا گیا، جہاں ڈاکٹروں نے اسے مردہ قرار دے دیا۔ لاپتہ سدھیر گوڑ کی تلاش جاری ہے۔