ایم سی ڈی انتخابات کا اعلان آج شام 4 بجے ہو سکتا ہے

نئی دہلی: دہلی میونسپل کارپوریشن الیکشن- 2022 کا اعلان آج ہو سکتا ہے۔ اطلاع کے مطابق ریاستی الیکشن کمیشن کی جانب سے آج شام 4 بجے نگم بھون، کشمیری گیٹ میں ایک پریس کانفرنس کا انعقاد کیا جائے گا۔ اس پریس کانفرنس میں ایم سی ڈی انتخابات کا اعلان ہونے کا امکان ہے۔ دہلی میونسپل کارپوریشن کی 250 سیٹوں میں سے 42 سیٹیں ریزرو یعنی دلت کوٹے کے لیے مختص کی گئی ہیں۔ ساتھ ہی 50 فیصد نشستیں خواتین کے لیے مختص کی جائیں گی۔ ان نشستوں کو بھی نشان زد کر دیا گیا ہے۔

دہلی میونسپل کارپوریشن کے وارڈوں کی حد بندی کے بعد مرکزی حکومت نے 18 اکتوبر کو ایک نوٹیفکیشن جاری کیا تھا۔ نوٹیفکیشن میں کمیشن نے کہا تھا کہ چیف الیکٹورل افسران کے ذریعہ نظر ثانی شدہ انتخابی فہرستوں کی آخری تاریخ یکم جنوری 2022 ہے، اسے ایم سی ڈی انتخابات کے لیے ووٹر لسٹ کے طور پر سمجھا جائے گا۔ عہدیداروں نے کہا تھا کہ اس کا مطلب یہ ہے کہ صرف وہی لوگ جو یکم جنوری 2022 تک ووٹر بنیں ہیں، آئندہ ایم سی ڈی انتخابات میں اپنا ووٹ ڈال سکیں گے۔

عام آدمی پارٹی نے حال ہی میں دعویٰ کیا تھا کہ 2017 کی طرح، بی جے پی نے بدعنوانی میں مبینہ طور پر ملوث ہونے کی وجہ سے اپنے موجودہ کونسلروں کو ایم سی ڈی انتخابات میں کھڑا نہ کرنے کا فیصلہ کیا ہے۔عام آدمی پارٹی کے ایم سی ڈی الیکشن انچارج درگیش پاٹھک نے بی جے پی کونسلروں پر 35,000 کروڑ روپے "ہتھیانے" کا الزام لگایا تھا۔ دوسری طرف دہلی بی جے پی نے جوابی کارروائی کرتے ہوئے الزام لگایا کہ درگیش پاٹھک نے خبروں میں رہنے کے لیے ایسی کہانیاں گڑھیں۔

اس بار دہلی میں مزکزی حکومت نے کارپوریشنوں کو انضمام کیا ہے۔ اگرچہ کارپوریشن کو زیادہ بااختیار بنایا جانا چاہئے، لیکن اس کی دفعات ایم سی ڈی انٹیگریشن ایکٹ میں نہیں ہیں تاکہ عوام کو زیادہ فوائد مل سکیں۔ اس کے علاوہ کارپوریشن، کونسلرز اور میئر کے طاقتور بننے یا نئے حقوق حاصل کرنے کی وجہ کے بارے میں ایکٹ میں کوئی ذکر نہیں ہے۔