مہوا موئترا نے ای ڈی کے سمن کو کیا نظر انداز، کرشنا نگر میں چلائیں گی انتخابی مہم

ای ڈی نے فارن ایکسچینج مینجمنٹ ایکٹ (فیما) کی خلاف ورزی کے معاملے میں پوچھ گچھ کے لیے موئترا اور دبئی کے تاجر درشن ہیرانندانی کو تازہ سمن جاری کیا تھا۔ ٹی ایم سی کی 49 سالہ لیڈر مہوا موئترا کو مرکزی ایجنسی نے پہلے دو بار پوچھ گچھ کے لیے بلایا تھا لیکن وہ سرکاری کام کا حوالہ دیتے ہوئے حاضر نہیں ہوئیں اور نوٹس کو ملتوی کرنے کا مطالبہ کیا۔

موئترا کو دسمبر میں لوک سبھا سے مبینہ غیر اخلاقی برتاؤ کی وجہ سے برطرف کر دیا گیا تھا۔ ان کی پارٹی نے انہیں دوبارہ آئندہ لوک سبھا انتخابات میں مغربی بنگال کی کرشنا نگر سیٹ سے اپنا امیدوار نامزد کیا ہے۔

مرکزی تفتیشی ایجنسی (سی بی آئی) نے ہفتہ کو ٹی ایم سی لیڈر کے گھر پر مبینہ طور پر پیسے لینے اور سوالات پوچھنے کے سلسلے میں چھاپہ مارا تھا۔ اس سے کچھ دن پہلے لوک پال نے سی بی آئی کو ہدایت دی تھی کہ وہ بی جے پی رکن پارلیمنٹ نشی کانت دوبے کے ذریعہ موئترا پر لگائے گئے الزامات کی تحقیقات کرے۔ موئترا کا کہنا ہے کہ اس نے کچھ غلط نہیں کیا ہے۔