ملک کی وزیر خزانہ کے پاس الیکشن لڑنے کے لیے پیسے نہیں!

ملک کے خزانے کا حساب و کتاب رکھنے والی وزیر خزانہ نرملا سیتارمن کے پاس الیکشن لڑنے کے لیے پیسے نہیں ہیں۔ یہ انکشاف انہوں نے خود ہی کیا ہے۔ انہوں نے کہا کہ پارٹی صدر جے پی نڈا نے مجھ سے لوک سبھا الیکشن لڑنے کے بارے میں پوچھا تھا مگر انہوں نے انکار کر دیا کیونکہ ان کے پاس الیکشن لڑنے کے لیے ضروری فنڈ نہیں ہے!

وزیر خزانہ نرملا سیتا رمن نے کہا، ’’بی جے پی صدر جے پی نڈا نے مجھے آندھرا پردیش یا تمل ناڈو سے الیکشن لڑنے کا آپشن دیا تھا، مگر میں نے انکار کر دیا۔ ہفتہ دس دن تک سوچنے کے بعد میں نے جواب دیا۔ میرے پاس الیکشن لڑنے کے لیے اتنے پیسے نہیں ہیں، چاہے وہ آندھرا پردیش ہو یا تمل ناڈو۔ جیتنے میں معاون بننے والے مختلف فیکٹرس کا بھی سوال ہے، کیا آپ کا تعلق کسی خاص کمیونٹی یا مذہب سے ہے؟ کیا آپ اس سے تعلق رکھتے ہیں؟ میں نے کہا نہیں، مجھے نہیں لگتا کہ میں ایسا کر سکتی ہوں۔‘‘

نرملا سیتا رمن نے کہا کہ ’’میں بہت شکر گزار ہوں کہ انہوں نے میری دلیلیں تسلیم کر لیں، اس لیے میں الیکشن نہیں لڑ رہی ہوں۔‘‘ جب ان سے پوچھا گیا کہ ملک کے وزیر خزانہ کے پاس الیکشن لڑنے کے لیے اتنے فنڈز کیوں نہیں ہیں؟ تو انہوں نے کہا کہ ہندوستان کا کنسولیڈیٹڈ فنڈ ان کا ذاتی فنڈ نہیں ہے۔ انہوں نے کہا ’’میری تنخواہ، میری کمائی اور میری بچت میری ہے، ہندوستان کا کنسولیڈیٹڈ فنڈ نہیں ہے۔‘‘

وزیر خزانہ کا کہنا ہے کہ وہ دوسرے امیدواروں کے لیے مہم چلائیں گی۔ انہوں نے کہا کہ ’’میں میڈیا کے بہت سے پروگراموں میں حصہ لوں گی اور امیدواروں کے ساتھ رہوں گی- میں انتخابی مہم میں رہوں گی۔‘‘ واضح رہے کہ وزیر خزانہ نرملا سیتارمن کرناٹک سے راجیہ سبھا کی رکن ہیں۔

چند روز قبل ان کے شوہر پرکلا پربھاکر کا ایک بیان میڈیا میں آیا تھا جس میں انہوں نے کہا تھا کہ ’’الیکٹورل بانڈ ہندوستان ہی نہیں بلکہ دنیا کا سب سے بڑا گھوٹالہ ہے، یہ بہت اہم ایشو بنے گا۔ بی جے پی کی لڑائی اپوزیشن یا پھر دیگر پارٹیوں سے نہیں ہوگی بلکہ اس ایشو کی وجہ سے اصل لڑائی بی جے پی اور ملک کی عوام کے درمیان ہوگی۔‘‘

دریں اثنا نیوز پورٹل ’آج تک‘ پر پی ایم او کے حوالے سے وزیر خزانہ نرملا سیتا رمن کی جائیداد و املاک کی ایک فہرست شائع ہوئی ہے، جس کے مطابق وزیر خزانہ کے پاس دیگر کابینی وزراء کے مقابلے میں بہت کم اثاثے ہیں۔ وزیر اعظم کے دفتر کے مطابق 31.03.2023 تک نرملا سیتا رمن کی جائیداد رہائشی عمارت 17051400 روپے (شوہر کے ساتھ مشترکہ جائیداد)، غیر زرعی زمین  708800 روپے، بجاج چیتک اسکوٹر کی قیمت 28260 روپے، زیورات 1846987 روپے، بینک بینلس 3552666 روپے، پی پی ایف 159763 روپے، میوچوئل فنڈ 580424 روپے، دیا گیا قرض 270000 روپے اور دیگر حاصل شدہ آمدنی 508536 روپے کے اثاثے ہیں۔