مہاراشٹر اسٹیٹ حج کمیٹی کی تشکیل عمل میں آئی، آصف عثمان خان بلامقابلہ چیئرمین منتخب

ممبئی: آج 12 جون بروز پیر ممبئی میں مہاراشٹر اسٹیٹ حج کمیٹی کے چئیرمین کا انتخاب عمل میں آیا۔ مہاراشٹر کے انتظامی امور کے دفتر منترالیہ میں محکمہ اقلیتی بہبود کے سکریٹری معین تحصیلدار کی نگرانی میں ریاستی حج کمیٹی کے چیئرمین آصف عثمان خان کو بلامقابلہ منتخب کر لیا گیا۔

اقلیتی فلاح محکمہ کے سکریٹری معین تحصیلدار نے نمدئندے کو بتایا کہ آج صبح گیارہ بجے منترالیہ کے ساتویں منزل پر ہونے والے انتخاب میں ریاستی حج کمیٹی کے نو اراکین نے شرکت کی۔ ناگپور سے تعلق رکھنے والے آصف عثمان خان کو تین سال کے لیے بلامقابلہ صدرمنتخب کر لیا گیا۔ انہوں نے بتایا کہ آصف عثمان خان کے علاوہ کسی رکن نے پرچہ نہیں بھرا تھا، اس بنیاد پر آصف عثمان خان کو بلامقابلہ ریاستی حج کمیٹی کی چیئرمین شپ کے لیے منتخب کر لیا گیا۔

نومنتخب شدہ چیئرمین نے آج شام ممبئی کے مسافرخانہ میں واقع ریاستی حج کمیٹی کے صدر دفتر میں پہنچ کر چارج سنبھالا۔ اس موقع پر انہوں نے حج کمیٹی کے اراکین و اسٹاف کے ساتھ پہلی میٹنگ کی۔ اس موقع پر انہوں نے نمائندہ سے بات کرتے ہوئے کہا کہ ریاستی حج کمیٹی عازمین حج کی خدمت کے لیے ہمہ وقت تیار رہے گی اور عازمین کے مسائل کے حل کے لیے کوشاں رہے گی۔

ریاستی حج کمیٹی کے رکن اعجاز خان نے کہا کہ تین سال کے عرصے کے بعد ریاستی حج کمیٹی کی تشکیل عمل میں آئی ہے۔ گزشتہ مہاوکاس اگھاڑی کی حکومت میں ڈھائی سال تک حج کمیٹی سمیت مائناریٹی کمیٹیوں کی تشکیل پر دھیان نہیں دیا گیا تھا۔ بی جے پی نے ناگپور کے ایک عام کارکن جو زمینی سطح پر گزشتہ 25 سالوں سے متحرک ہے۔ انہیں ریاستی حج کمیٹی کی ذمہ داری سونپی گئی ہے۔

واضح رہے کہ آصف عثمان خان کا تعلق بی جے پی سے ہے اور وہ ناگپور شہر بی جے پی کے سکریٹری ہیں اور گزشتہ 25 سالوں سے پارٹی میں سرگرم ہیں۔ جانکار افراد کا ماننا ہے کہ کارپوریشن، اسمبلی اور پارلیمنٹ انتخابات کے پیش نظر ریاست کی شندے حکومت ریاست کی اقلیتی کمیٹی کی تشکیل کے لیے سرگرم ہو گئی ہے۔ شندے قیادت والی شیوسینا اور بی جے پی کے درمیان اقلیتی کمیٹیوں کی تقسیم عمل میں آ چکی ہے۔ ریاستی حج کمیٹی بی جے پی کے حصے میں آئی ہے۔

یاد رہے کہ ریاستی حج کمیٹی ایک عرصے سے عدم تشکیل کا شکار تھی۔ اس بنیاد پر مرکزی حج کمیٹی میں نمائندگی کا معاملہ بھی سرد خانے میں پڑا ہوا تھا۔ گزشتہ دنوں حافظ نوشاد کی عرضداشت پر سماعت کرتے ہوئے سپریم کورٹ نے ریاستی حج کمیٹیوں کی تشکیل کی ہدایت دی تھی۔

یاد رہے کہ حج 2023 کے لیے عازمین حج کی روانگی کا سلسلہ شروع ہو چکا ہے۔ ممبئی، اورنگ آباد اور ناگپور سے عازمین حج کی روانگی کا سلسلہ 7 جون سے شروع ہو چکا ہے۔ پروازوں کی روانگی کا سلسلہ 22 جون تک جاری رہے گا۔