جموں و کشمیر انتخابات: ریاستی بی جے پی کے نائب صدر کا آزاد امیدوار کے طور پر الیکشن لڑنے کا اعلان

جموں: جموں و کشمیر بی جے پی کے ریاستی نائب صدر پون کمار کھجوریا اس بات سے ناراض ہو گئے ہیں کہ پارٹی نے انہیں امیدوار نہیں بنایا۔ کھجوریا نے اعلان کیا ہے کہ وہ آزاد امیدوار کے طور پر انتخابی میدان میں اتریں گے۔ رپورٹ کے مطابق کھجوریا بدھ کو ادھم پور ایسٹ سے آزاد امیدوار کے طور پر اپنا پرچہ نامزدگی داخل کرنے جا رہے ہیں۔

پون کمار کھجوریا نے بتایا، ’’میں ایک عام کارکن تھا لیکن بی جے پی نے ایسے امیدوار کو نامزد کیا جس نے حال ہی میں ختم ہونے والے لوک سبھا انتخابات میں بی جے پی امیدوار کے خلاف کام کیا تھا۔‘‘

انہوں نے کہا کہ انہیں اسمبلی انتخابات میں امیدوار نہ بنائے جانے پر پارٹی کارکنوں میں کافی غصہ ہے۔ کارکنوں کی بڑی تعداد کہہ رہی ہے کہ وہ ایسے امیدوار کی حمایت نہیں کریں گے جس نے لوک سبھا انتخابات میں پارٹی کے خلاف کام کیا ہو۔

پون کمار کھجوریا نے بتایا کہ کارکنوں نے فیصلہ کیا ہے کہ وہ اسمبلی الیکشن میں میری حمایت کریں گے، جس پر میں نے رضامندی ظاہر کی ہے۔ بدھ کو صبح 11 بجے وہ نند پیلس میں جمع ہوں گے اور ایک بہت بڑی ریلی نکالیں گے اور مشرقی ادھم پور سے اسمبلی انتخابات کے لیے پرچہ نامزدگی داخل کریں گے۔

خیال رہے کہ ریاست جموں و کشمیر میں تین مرحلوں میں ووٹنگ ہوگی، پہلا مرحلہ 18 ستمبر، دوسرا مرحلہ 25 ستمبر اور آخری مرحلہ یکم اکتوبر کو ہوگا۔ تمام 90 سیٹوں کے نتائج 8 اکتوبر کو ایک ساتھ سامنے آئیں گے۔