’بہار میں نقلی شراب پی کر مرنا اچھی روایت، اس سے آبادی کم ہوتی ہے‘

بہار کے وزیر اعلیٰ نتیش کمار کے قریبی جنتا دل یو رکن اسمبلی گوپال منڈل نے بدھ کے روز اس وقت تنازعہ کھڑا کر دیا جب انھوں نے کہا کہ بہار میں لوگ مرنے کے لیے زہریلی شراب پی رہے ہیں۔ یہ بیان ایسے وقت میں آیا ہے جب بہار میں زہریلی شراب کے واقعات پر نتیش حکومت تنقید کا سامنا کر رہی ہے۔

اکثر اپنے متنازعہ بیانات کے لیے سرخیوں میں رہنے والے جنتا دل یو رکن اسمبلی گوپال منڈل نے میڈیا اہلکاروں سے بات کرتے ہوئے کہا کہ ’’وزیر اعلیٰ نتیش کمار ریاست کے لوگوں سے زہریلی شراب سے دور رہنے کی اپیل کر رہے ہیں۔ پھر بھی لوگ نقلی شراب بنا کر پی رہے ہیں۔ وہ مرنے کے لیے نقلی شراب پی رہے ہیں۔‘‘

گوپال منڈل اتنے پر ہی خاموش نہیں ہوئے، انھوں نے یہ بھی کہہ دیا کہ ’’بہار کے لوگوں کا نقلی شراب پینا اور مرنا ایک اچھی روایت ہے، کیونکہ یہ سماج میں جگہ بناتا ہے اور ریاست کی آبادی کو کم کرتا ہے۔ ہمارے وزیر اعلیٰ نتیش کمار بہار کے لوگوں کو شراب پینے سے بچنے کے لیے لگاتار متنبہ کر رہے ہیں۔ پھر وہ ایسا کیوں کر رہے ہیں؟‘‘

واضح رہے کہ گوپال منڈل بہار کے ان چنندہ اراکین اسمبلی میں سے ہیں جو لگاتار تنازعات میں رہتے ہیں اور گزشتہ سال 2 ستمبر کو راجندر نگر-نئی دہلی تیجس راجدھانی ایکسپریس میں کم کپڑوں میں گھومتے ہوئے کیمرے میں قید ہوئے تھے، جس پر بہت ہنگامہ بھی ہوا تھا۔

اس درمیان جنتا دل یو کے ایک دیگر رکن اسمبلی اور تین بار کے رکن اسمبلی شیام بہادر سنگھ نے گزشتہ 17 جنوری کو سیوان ضلع کے گاندھی میدان میں ایک شرابی سمیلن منعقد کرنے کا دعویٰ کیا۔ انھوں نے یہ بھی کہا کہ شراب بندی کے فیصلے سے نتیش کمار کی مقبولیت گھٹ رہی ہے۔