’انڈیا بلاک لوک سبھا انتخاب کے نتائج برآمد ہونے کے بعد 24 گھنٹے میں وزیر اعظم عہدہ کا نام بتا دے گا‘، سنجے راؤت کا دعویٰ

شیوسینا لیڈر سنجے راؤت نے پیر کے روز ایک بیان میں کہا کہ اپوزیشن پارٹیوں کا اتحاد ’انڈیا‘ لوک سبھا انتخاب کے نتائج سامنے آنے کے بعد 24 گھنٹے میں وزیر اعظم عہدہ کے اپنے امیدوار کا اعلان کر دے گا۔

قابل ذکر ہے کہ ملک بھر میں 7 مراحل میں ہوئے لوک سبھا انتخاب کے بعد ووٹ شماری منگل کی صبح 8 بجے شروع ہوگی۔ اس سے قبل سبھی پارٹیاں اپنی اپنی طرف سے مستعد ہیں اور الیکشن کمیشن نے بھی ووٹ شماری کے لیے سبھی تیاریاں مکمل کر لی ہیں۔

بہرحال، انڈیا اتحاد کے وزیر اعظم عہدہ کے امیدوار سے متعلق ایک سوال کا جواب دیتے ہوئے سنجے راؤت نے کہا کہ ’’ہمارے پاس وزیر اعظم عہدہ کے لیے کئی امیدوار ہیں، لیکن بی جے پی کا کیا؟ انڈیا اتحاد نتائج سامنے آنے کے بعد 24 گھنٹے میں وزیر اعظم عہدہ کے اپنے امیدوار کا اعلان کرے گا۔‘‘ انھوں نے مزید کہا کہ اپوزیشن خیمہ کے سبھی لیڈران دہلی میں ملاقات کریں گے اور وہیں وزیر اعظم عہدہ کے لیے نام کا اعلان ہوگا۔

انتخابی بے ضابطگیوں اور مثالی ضابطہ اخلاق کی خلاف ورزی کو لے کر اپوزیشن پارٹیوں کی شکایتیں مبینہ طور پر نظر انداز کرنے پر انتخابی کمیشن کی تنقید کرتے ہوئے راجیہ سبھا رکن سنجے راؤت نے کہا کہ ’’ہم نے انتخابی کمیشن کو 17 شکایتی خطوط لکھے، لیکن ہمیں ان پر کوئی جواب نہیں ملا۔‘‘

کانگریس لیڈر جئے رام رمیش کے اس دعویٰ کے بارے میں پوچھے جانے پر کہ مرکزی وزیر داخلہ امت شاہ نے 4 جون کو ہونے والی ووٹ شماری سے قبل ملک بھر کے کئی ضلع مجسٹریٹس کو فون کیا ہے، راؤت نے کہا کہ ’’یہ انتہائی سنگین ایشو ہے۔ ہم نے پایا ہے کہ ان میں سے 12 (ضلع مجسٹریٹس) مہاراشٹر سے ہیں۔‘‘