میونسپل الیکشن جیتنے پر روہنگیاؤں کے خلاف کریں گے سرجیکل اسٹرائیک: تلنگانہ بی جے پی

پارلیمانی اور اسمبلی انتخاب میں لیڈروں کی شعلہ بیانی تو ہمیشہ دیکھنے کو ملتی ہے، لیکن اب میونسپل انتخابات میں بھی حالات کچھ ایسے ہی نظر آ رہے ہیں۔ یکم دسمبر کو حیدر آباد میں میونسپل انتخاب ہونا ہے جس کے پیش نظر سیاسی پارٹیوں کی مہم اپنے عروج پر ہے۔ اس درمیان تلنگانہ بی جے پی صدر اور رکن پارلیمنٹ بنڈی سنجے کمار نے متنازعہ بیان دیتے ہوئے کہا ہے کہ ’’بی جے پی میونسپل انتخاب میں میئر کا عہدہ جیتتی ہے تو روہنگیاؤں اور پاکستانیوں کو بھگانے کے لیے اس پرانے شہر میں سرجیکل اسٹرائیک کرے گی۔‘‘ یہ بیان انھوں نے حیدر آباد کے اولڈ سٹی علاقہ میں دیا۔ بی جے پی صدر کے اس بیان پر ٹی آر ایس اور اے آئی ایم آئی ایم نے سخت اعتراض ظاہر کیا ہے۔

بی جے پی ریاستی صدر کے بیان پر اے آئی ایم آئی ایم سربراہ اسدالدین اویسی نے جوابی حملہ کرتے ہوئے بی جے پی کو اولڈ سٹی میں پاکستانی شہریوں کی شناخت کرنے کا چیلنج پیش کیا ہے۔ اویسی نے اپنے بیان میں کہا کہ ’’میں بی جے پی کو 24 گھنٹے دیتا ہوں، انھیں بتانے دیں کہ اولڈ سٹی میں کتنے پاکستانی مقیم ہیں۔‘‘ ساتھ ہی اویسی نے بی جے پی قیادت والی این ڈی اے حکومت کو چینی پی ایل اے پر سرجیکل اسٹرائیک کرنے کا بھی چیلنج دیا۔ انھوں نے ایک انتخابی تشہیر کے دوران کہا کہ ’’میں بی جے پی کو بتانا چاہتا ہوں جس نے یہ بیان دیا ہے، اور میں وزیر اعظم کو بتانا چاہتا ہوں کہ چین کی پی ایل اے نے لداخ میں ہماری زمین پر قبضہ کیا ہے۔ پی ایم مودی کیا آپ ہماری زمین پر قبضہ کرنے والے چین پر سرجیکل اسٹرائیک نہیں کریں گے۔‘‘

دوسری طرف بی جے پی لیڈر کے متنازعہ بیان پر ٹی آر ایس کے کارگزار سربراہ کے ٹی راماراؤ نے بھی سخت رد عمل ظاہر کیا ہے۔ انھوں نے سوال کیا ہے کہ کیا وزیر مملکت جی کشن ریڈی اپنی پارٹی کے معاون کے قابل مذمت اور نفرت انگیز تبصروں کی مذمت کریں گے۔ راما راؤ نے ساتھ ہی یہ بھی کہا کہ ’’مرکز میں اقتدار میں ہونے کے ناطے بی جے پی لیڈروں کو غریبی اور بے روزگاری جیسے مسائل پر سرجیکل اسٹرائیک کرنا چاہیے۔‘‘