ہنڈن برگ رپورٹ نے مچا دی ہلچل: آر بی آئی نے بینکوں سے پوچھا، اڈانی گروپ میں کتنی سرمایہ کاری کی ہے؟

ہنڈن برگ رپورٹ کے سامنے آنے کے بعد سے اڈانی گروپ کی مشکلات میں اضافہ ہوتا جا رہا ہے۔ اطلاعات کے مطابق اس سب کے درمیان ریزرو بینک آف انڈیا (آر بی آئی) نے تمام بینکوں سے پوچھا ہے کہ انہوں نے اڈانی گروپ میں کتنی رقم کی سرمایہ کاری کی ہے۔ نیوز پورٹل نو جیون انڈیا میں شائع خبر کے مطابق، آر بی آئی نے بینکوں سے کہا ہے کہ وہ اڈانی گروپ کی کمپنیوں، حکومت اور بینکنگ ذرائع  کے لئے اپنے خطرات کی تفصیلات بتائیں۔

رپورٹس میں کہا گیا ہے کہ آر بی آئی پہلے سے ہی کچھ سرکردہ بینکوں کے ساتھ رابطے میں ہے جو اڈانی گروپ کو قرض دینے والے ہیں اور رسک پروفائل کی تصدیق کے لیے قرض دہندگان کے ساتھ بات چیت کر رہے ہیں۔ یہ خبر ایسے وقت میں آئی ہے جب اڈانی گروپ نے اپنے 20,000 کروڑ روپے کے ایف پی او یعنی فالو اپ پبلک آفر کو منسوخ کرنے کا اعلان کیا ہے۔ اڈانی انٹرپرائزز لمیٹڈ کے چیئرمین گوتم اڈانی نے کہا ہے کہ مارکیٹ میں اتار چڑھاؤ کو دیکھتے ہوئے کمپنی کے بورڈ نے ایف پی او کو منسوخ کرنے کا فیصلہ کیا ہے۔

اس سے پہلے، اڈانی انٹرپرائزز کے حصص بدھ کو بی ایس ای پر 26 فیصد سے زیادہ گر کر 2,180.20 روپے پر بند ہوئے۔ اسی دوران یہ خبر بھی آئی کہ کریڈٹ سوئس نے اڈانی کمپنیوں کے بانڈز کو قبول کرنا بند کر دیا ہے جنہیں مارجن کریڈٹ کے لیے گروی رکھا گیا ہے۔

اڈانی کے بانڈز میں گراوٹ کے درمیان، کمپنی کو اس ہفتے اپنے ڈالر بانڈز پر تقریباً 34.7 ملین ڈالر کے کوپن کی ادائیگی کرنی ہے۔ یہ بانڈز امریکی شارٹ سیلرز کی طرف سے دھوکہ دہی اور مارکیٹ میں ہیرا پھیری کے الزامات کے بعد تشویشناک سطح پر گر چکے ہیں۔ اڈانی پورٹس اور اسپیشل اکنامک زون کو آج (جمعرات) تین بانڈز کے لیے 24.7 ملین ڈالر ادا کرنے ہیں۔