برج بھوشن شرن سنگھ کے خلاف الزامات طے کرنے کے معاملے میں سماعت ملتوی

دہلی کی راؤز ایونیو عدالت نے ریسلنگ فیڈریشن آف انڈیا کے سابق صدر اور بی جے پی کے رکن پارلیمنٹ برج بھوشن شرن سنگھ کے خلاف جنسی ہراسانی کے معاملے میں الزامات عائد کرنے سے متعلق سماعت ملتوی کر دی ہے۔ عدالت نے التوا کا یہ فیصلہ برج بھوشن شرن سنگھ کی جانب سے عدالت میں داخل کی گئی ایک درخواست کے بعد کیا ہے، جس میں انہوں نے دعویٰ کیا ہے کہ جنسی ہراسانی کا واقعہ جس دن وقوع پذیر ہوا اس دن وہ ملک کے باہر تھے۔

عدالت میں پیش کی گئی اپنی درخواست میں برج بھوشن شرن سنگھ نے کہا ہے کہ جس دن خاتون پہلوانوں نے جنسی زیادتی کی بات کی ہے یعنی 7 ستمبر 2022 کے دن، تو اس دن وہ ملک کے باہر تھے۔ اس کے ثبوت کے طور پر انہوں نے اپنے پاسپورٹ کی نقل جمع کرائی ہے۔ انہوں نے اس واقعے کی مزید تحقیقات کا مطالبہ کیا ہے۔ اس درخواست کے بعد راؤز ایونیو کورٹ کی ایڈیشنل چیف میٹروپولیٹن مجسٹریٹ پرینکا راجپوت نے الزامات طے کرنے سے متعلق سماعت ملتوی کر دی۔ اب اس معاملہ پر پر 26 اپریل کو سماعت ہوگی۔

برج بھوشن شرن سنگھ نے اپنی درخواست میں واقعہ والے دن اپنے بیرون ملک ہونے کے دعوے کی تفصیلی تحقیقات کا مطالبہ کرتے ہوئے دہلی پولیس کال ڈیٹیل ریکارڈ (سی ڈی آر) بھی طلب کیا ہے۔ دہلی پولیس کی نمائندگی کرنے والے اے پی پی اتل سریواستو نے درخواست کی مخالفت کرتے ہوئے کہا کہ درخواست کا وقت اسٹریٹجک ہے اور اس کا مقصد کیس کو طول دینا ہے۔ انہوں نے اس مرحلے پر تحقیقات کو دوبارہ کھولنے کے ممکنہ قانونی مضمرات کو عدالت کے روبرو پیش کیا۔ دریں اثنا شکایت کنندگان کے قانونی وکیل نے بھی اس درخواست کو کارروائی میں تاخیر اور رخنہ ڈالنے کا ایک حربہ قرار دیا۔ انہوں نے دلیل دی کہ ضابطہ فوجداری کے دفعہ 207 کے تحت ضروری دستاویزات پہلے ہی خریدے جا نے چاہئے تھے جو ملزم کو ثبوت پہنچانے سے متعلق ہے۔