جس آئین نے ریزرویشن دیا وہ خطرے میں ہے، ہمیں بی جے پی کو سبق سکھانا ہوگا: لالو پرساد یادو

راشٹریہ جنتا دل (آر جے ڈی) کے صدر لالو پرساد یادو نے بی جے پی پر سخت حملہ کرتے ہوئے کہا ہے کہ بابا صاحب بھیم راؤ امبیڈکر کے بنائے ہوئے آئین کو مٹانے اور ختم کرنے کی کوشش کی جا رہی ہے، جس نے محروم طبقات اور پسماندہ ذات کے لوگوں کو ریزرویشن دیا ہے۔ انہوں نے یہ باتیں سارن لوک سبھا حلقے میں ایک انتخابی ریلی سے خطاب کے دوران کہیں۔ وہ اس لوک سبھا سیٹ سے کئی بار خود بھی نمائندگی کر چکے ہیں، جہاں سے اس بار ان کی بیٹی روہنی آچاریہ اپنی قسمت آزما رہی ہیں۔

لالو پرساد یادو نے مرکز میں حکمراں بی جے پی پر حملہ کرتے ہوئے کہا کہ بابا صاحب امبیڈکر کے بنائے ہوئے آئین کو مٹانے اور تباہ کرنے کی کوشش کی جا رہی ہے۔ اگر آئین نہ ہوتا تو نہ ریزرویشن ہوتا اور نہ ہی جمہوریت۔ ہمیں ان لوگوں کو سبق سکھانا ہوگا جو آئین کو ختم کرنا چاہتے ہیں۔ آر جے ڈی سربراہ نے کہا کہ بی جے پی لیڈر کھلے عام یہ کہہ رہے ہیں کہ اگر وہ دوبارہ اقتدار میں آئے تو آئین کو تبدیل کر دیں گے لیکن پارٹی اور وزیر اعظم نریندر مودی اس معاملے پر بالکل خاموشی اختیار کئے ہوئے ہیں۔ انہوں نے یہ بھی کہا کہ اس سے قبل آر ایس ایس کے سر سنگھ چالک موہن بھاگوت نے بھی ریزرویشن پر نظرثانی کی بات کی تھی۔

روہنی آچاریہ کی انتخابی مہم کے اس جلسے میں لالو پرساد یادو اپنی اہلیہ رابڑی دیوی کے ہمراہ تھے۔ یہ لوک سبھا سیٹ پہلے چھپرا کے نام سے جانی جاتی تھی۔ لالو پرساد نے 1997 میں یہاں سے لوک سبھا کا الیکشن لڑا تھا۔ بی جے پی کے راجیو پرتاپ روڈی فی الحال یہاں سے ایم پی ہیں، جو پھر سے بی جے پی کے امیدوار ہیں۔

لالو پرساد کے چھوٹے بیٹے اور ان کے سیاسی جانشین مانے جانے والے تیجسوی یادو اب تک پارٹی کی انتخابی مہم کو تنہا سنبھال رہے تھے۔ انہوں نے اپنی بڑی بہن کی انتخابی مہم میں اپنے والد کی شرکت پر خوشی کا اظہار کیا۔ تیجسوی یادو نے کہا کہ میری بہن نے ہمارے والد کی مثالی خدمت کی ہے، وہ اسی جذبے سے لوگوں کی بھی خدمت کرے گی۔ ان کا اشارہ اپنی بہن کے ذریعے اپنے والد کو کڈنی عطیہ کرنے کی جانب تھا۔

تیجسوی یادو نے کہا کہ لوگ چاہتے تھے کہ لالو جی ان کے درمیان آئیں۔ ان کی خواہش پوری ہوئی ہے، یہ ہم سب کے لیے خوشی کی بات ہے۔ یہ پوچھے جانے پر کہ کیا آر جے ڈی سپریمو مستقبل میں بھی انتخابی مہم میں حصہ لیں گے؟ تیجسوی نے کہا کہ وہ ان کے لیڈر ہیں۔ ان کی قیادت میں بہار میں انڈیا الائنس کام کر رہا ہے، وہ کیوں نہیں کریں گے؟ واضح رہے کہ سارن لوک سبھا سیٹ پر پانچویں مرحلے میں 20 مئی کو ووٹنگ ہوگی۔