ہریانہ اسمبلی انتخاب: انڈین نیشنل لوک دَل اور بہوجن سماج پارٹی میں اتحاد قائم، 37 سیٹوں پر امیدوار اتاریں گی مایاوتی

ہریانہ میں اسمبلی انتخاب کے زیادہ دن نہیں بچے ہیں، اس لیے سیاسی سرگرمیاں تیز ہوتی ہوئی دکھائی دے رہی ہیں۔ تازہ ترین خبر یہ ہے کہ انڈین نیشنل لوک دَل (آئی این ایل ڈی) اور بہوجن سماج پارٹی (بی ایس پی) نے ہریانہ اسمبلی انتخاب میں اتحاد قائم کرنے کا فیصلہ کیا ہے۔ دی گئی جانکاری کے مطابق ہریانہ کی 90 اسمبلی سیٹوں میں سے مایاوتی کی پارٹی (بی ایس پی) 37 سیٹوں پر اپنے امیدوار اتارے گی۔

دونوں پارٹیوں کے سرکردہ لیڈران نے فیصلہ کیا ہے کہ ابھے چوٹالہ اتحاد کے لیڈر ہوں گے۔ اس اتحاد کا اعلان کرتے ہوئے ابھے چوٹالہ نے کہا کہ یہ اتحاد مفاد کے لیے نہیں بلکہ عوام کی خواہش کا احترام کرتے ہوئے کیا گیا ہے۔ انھوں نے یہ بھی کہا کہ بی جے پی اور کانگریس نے ملک کو لوٹا ہے، اس لیے عوام کے سامنے ایک متبادل پیش کیا جا رہا ہے۔ ابھے چوٹالہ کا کہنا ہے کہ وہ غیر بی جے پی و غیر کانگریسی اتحاد بنا رہے ہیں اور کامیابی کے بعد حکومت بھی تشکیل دیں گے۔

دوسری طرف بی ایس پی کے نیشنل کوآرڈنیٹر اور مایاوتی کے جانشیں آکاش آنند نے کہا کہ اگر حکومت بنتی ہے تو ابھے چوٹالہ وزیر اعلیٰ بنائے جائیں گے۔ یہ اتحاد اسمبلی انتخاب تک محدود نہیں رہے گا بلکہ دیگر انتخابات بھی ایک ساتھ لڑے جائیں گے۔ آکاش نے یہ بھی کہا کہ 6 جولائی کو مایاوتی اور ابھے چوٹالہ کی میٹنگ ہوئی تھی جس کے بعد یہ فیصلہ کیا گیا۔

قابل ذکر ہے کہ تیسری بار ہے جب یہ دونوں پارٹیاں ایک ساتھ آئی ہیں۔ 1996 کے لوک سبھا انتخاب کے دوران انڈین نیشنل لوک دَل اور بی ایس پی کے درمیان پہلی بار اتحاد ہوا تھا۔ اس سال آئی این ایل ڈی نے 7 اور بی ایس پی نے 3 لوک سبھا سیٹوں پر انتخاب لڑا تھا۔ دونوں پارٹیوں کے درمیان دوسری بار اتحاد 2018 میں ہوا تھا۔ لیکن یہ اتحاد اسمبلی انتخاب سے پہلے ہی ٹوٹ گیا تھا۔