مئی ماہ میں جی ایس ٹی کلیکشن 12 فیصد بڑھ کر 1.57 لاکھ کروڑ روپے پہنچا، وزارت مالیات نے دی جانکاری

مرکزی وزارت مالیات نے آج مئی ماہ میں ہوئے جی ایس ٹی کلیکشن سے متعلق جانکاری شیئر کی۔ وزارت نے بتایا کہ مئی میں جی ایس ٹی کلیکشن 1.57 لاکھ کروڑ روپے رہا جو کہ سالانہ بنیاد پر 12 فیصد اضافہ کو ظاہر کرتا ہے۔ گزشتہ سال کی یکساں مدت میں یعنی مئی 2022 میں جی ایس ٹی کلیکشن تقریباً 1.41 لاکھ کروڑ روپے رہا تھا۔ اگر اس سے قبل والے ماہ یعنی اپریل سے اس کا موازنہ کریں تو اس میں کمی درج کی گئی ہے۔ اپریل 2023 میں جی ایس ٹی کلیکشن 1.87 لاکھ کروڑ روپے تھا جو مئی میں کم ہو کر 1.57 لاکھ کروڑ پر آ گیا ہے۔

سی جی ایس ٹی اپریل ماہ کے 38400 کروڑ روپے سے کم ہو کر 28400 کروڑ روپے ہو گیا۔ اپریل میں ایس جی ایس ٹی 47400 کروڑ روپے تھا، جو گھٹ کر 35800 کروڑ روپے پر آ گیا۔ اس کے ساتھ ہی آئی جی ایس ٹی میں بھی اپریل کے مقابلے مئی میں کمی آئی ہے۔ یہ 89200 کروڑ روپے سے گھٹ کر مئی 2023 میں 81400 کروڑ روپے پر آ گیا۔

ماہانہ جی ایس ٹی ریونیو لگاتار 14 مہینوں کے لیے 1.4 لاکھ کروڑ روپے سے اوپر بنا ہوا ہے۔ علاوہ ازیں ملک میں جی ایس ٹی کی شروعات کے بعد سے ہی یہ اعداد و شمار پانچویں بار 1.5 لاکھ کروڑ روپے کے پار پہنچا ہے۔ مال کی درآمد سے ریونیو سال در سال بنیاد پر 12 فیصد زیادہ رہا ہے۔ وہیں ڈومیسٹک ٹرانزیکشن (سروس کی درآمدگی سمیت) کا ریونیو سال در سال بنیاد پر 11 فیصد زیادہ ہے۔