امت شاہ نے منی پور تشدد کی جانچ کے لیے جیوڈیشیل کمیشن تشکیل دینے کا کیا اعلان، امن کمیٹی بھی ہوگی قائم

منی پور میں کشیدگی کچھ حد تک کم ضرور ہوئی ہے لیکن عوام میں خوف و دہشت کا ماحول برقرار ہے۔ مرکزی وزیر داخلہ امت شاہ حالات کا جائزہ لینے کے لیے منی پور کے دورہ پر ہیں۔ اس دوران ایک پریس کانفرنس میں انھوں نے اعلان کیا کہ منی پور تشدد کی جانچ کے لیے جیوڈیشیل کمیشن تشکیل دی جائے گی۔ اس کی صدارت ہائی کورٹ کے سبکدوش جج کریں گے۔ ساتھ ہی انھوں نے یہ بھی جانکاری دی کہ سی بی آئی کے ذریعہ بھی تشدد کے چھ واقعات کی جانچ کی جائے گی۔

پریس کانفرنس میں وزیر داخلہ نے عوام سے اپیل کی کہ جن کے پاس اسلحے ہیں وہ اسے پولیس کے پاس جمع کر دیں۔ کل سے پولیس کامبنگ کرے گی اور کامبنگ کے دوران جن لوگوں کے پاس اسلحے ملیں گے ان کے خلاف سخت کارروائی کی جائے گی۔ ریاست میں امن بحال کرنے کے لیے گورنر کی صدارت میں ایک ’امن کمیٹی‘ بھی تشکیل دی جائے گی۔ اس میں مختلف شہری تنظیموں کے لوگوں کو شامل کیا جائے گا۔

امت شاہ نے جانکاری دی کہ وزارت داخلہ کے جوائنٹ سکریٹری اور جوائنٹ ڈائریکٹر سطح کے افسر کے ساتھ ہی دیگر وزارتوں کے افسر بھی منی پور پہنچیں گے اور لوگوں کی مدد کریں گے۔ مرکزی حکومت طبی ماہرین کی آٹھ ٹیموں کو بھی منی پور بھیجے گی جن میں 20 ڈاکٹرس ہوں گے۔ یہ ٹیمیں تشدد متاثرہ علاقوں میں لوگوں کی مدد کریں گی۔ پانچ ٹیمیں منی پور پہنچ چکی ہیں اور تین دیگر ٹیمیں پہنچنے والی ہیں۔

اس درمیان امت شاہ نے بتایا کہ منی پور ہائی کورٹ کی طرف سے جلد بازی میں لیے گئے ایک فیصلے کی وجہ سے دو گروپوں کے درمیان تشدد کا واقعہ پیش آیا۔ مرکزی وزیر داخلہ نے عوام سے افواہوں پر توجہ نہ دینے اور ریاست میں امن بنائے رکھنے کی اپیل کی۔ ساتھ ہی انھوں نے شورش پسند گروپوں کو متنبہ کیا کہ وہ اگر ’ایس او او‘ معاہدہ کی کسی بھی طرح سے خلاف ورزی کرتے ہیں تو ان کے خلاف سخت کارروائی کی جائے گی۔