پی ایم مودی کے گجرات میں بھی کسان تحریک تیز، سابق وزیر اعلیٰ سمیت کئی کسان حراست میں

مودی حکومت کے ذریعہ پاس کردہ زرعی قوانین کے خلاف اب کسانوں کی تحریک مزید تیز ہونے لگی ہے۔ ایک طرف جہاں مودی حکومت کا کہنا ہے کہ یہ مخالفت صرف ہریانہ اور پنجاب میں ہو رہی ہے، وہیں دوسری جانب پی ایم مودی کے اس بیان کو گجرات سے آئی ایک تصویر نے جھوٹا ثابت کر دیا ہے۔ حقیقت یہ ہے کہ پورے ملک میں زرعی قوانین کے خلاف مظاہرہ چل رہے ہیں۔ یہاں تک کہ پی ایم مودی کے گجرات میں بھی کسان اب مظاہرہ کرتے ہوئے سڑکوں پر اتر آئے ہیں۔

اس درمیان گجرات کے سابق وزیر اعلیٰ شنکر سنگھ واگھیلا نے آج مرکزی حکومت کے زرعی قوانین کے خلاف کسان تنظیموں کو حمایت دینے کا اعلان کیا۔ مظاہرین کسانوں کی حمایت کرتے ہوئے واگھیلا نے احمد آباد میں ’چلو دلّی‘ مہم شروع کی۔ حالانکہ پولس کو ان کے حامیوں اور کسانوں کے جمع ہونے کی بھنک لگ گئی جس کے بعد بڑی تعداد میں پولس کی گاڑیاں ان کے پاس جا پہنچیں۔ پولس نے انھیں گھر پر نظر بند کر دیا ہے۔

میڈیا ذرائع سے موصول ہو رہی اطلاعات کے مطابق گاندھی آشرم کے باہر پولس نے واگھیلا کے حامیوں اور کسانوں کو آگے بڑھنے سے روک دیا۔ کچھ کو حراست میں لیا گیا۔ کسان تحریک کی حمایت میں مظاہرین نے نعرے بازی بھی کی۔ قابل ذکر ہے کہ دہلی کی سرحدوں پر زرعی قوانین کے خلاف گزشتہ ایک مہینے سے کسانوں کی تحریک جاری ہے۔ مظاہرین کا کہنا ہے کہ جب تک زرعی قوانین کو منسوخ نہیں کیا جاتا، اس وقت تک ہم یہیں بیٹھے رہیں گے، چاہے ایک سال یا اس سے زیادہ کا وقت گزر جائے۔