کسان تحریک: ’دہلی چلو مارچ‘ 29 فروری تک ملتوی، آج نکالیں گے ’کینڈل مارچ‘، سنیوکت کسان مورچہ نے کیا اعلان

کسان لیڈران نے جمعہ کی شب اپنے ’دہلی چلو مارچ‘ کو ملتوی کرنے کا اعلان کیا اور کہا کہ اب وہ اس سلسلے میں 29 فروری کو فیصلہ لیں گے۔ انھوں نے اعلان کیا کہ ہفتہ کے روز ’کینڈل مارچ‘ نکالا جائے گا اور اس کے دو دن بعد وہ مرکزی حکومت کا پُتلہ نذرِ آتش کریں گے۔

سنیوکت کسان مورچہ (غیر سیاسی) اور کسان مزدور مورچہ (کے ایم ایم) نے جمعہ کی شب کسان تحریک سے متعلق کچھ اہم فیصلے لیے۔ دونوں تنظیموں نے فصلوں کے لیے ایم ایس پی کی قانونی گارنٹی سمیت مختلف مطالبات کو لے کر کسان تحریک کی قیادت کر رہے ہیں۔ ان کی اپیل پر بڑی تعداد میں کسان ہریانہ و پنجاب کے درمیان شمبھو اور کھنوری بارڈر پر جمے ہوئے ہیں۔

کے ایم ایم لیڈر سرون سنگھ پنڈھیر نے کھنوری بارڈر پر میڈیا سے بات چیت کے دوران کہا کہ ’’کسان تحریک کے تحت اگلے قدم کا اعلان 29 فروری کو کیا جائے گا۔‘‘ ساتھ ہی انھوں نے اعلان کیا کہ وہ 24 فروری کو کینڈل مارچ نکالیں گے اور 26 فروری کو مرکزی حکومت کا پُتلا جلایا جائے گا۔

کسان لیڈران نے کھنوری میں تصادم کے دوران ایک احتجاجی کی موت اور تقریباً 12 پولیس اہلکاروں کے زخمی ہونے کے بعد بدھ کے روز ’دہلی چلو‘ تحریک کو دو دنوں کے لیے روک دیا تھا۔ مذکورہ واقعہ تب پیش آیا جب کسانوں نے بیریکیڈس کو توڑتے ہوئے آگے بڑھنے کی کوشش کی۔

واضح رہے کہ فصلوں کے لیے ایم ایس پی کی قانونی گارنٹی اور زرعی قرض کی معافی سمیت اپنے مختلف مطالبات کو لے کر ہزاروں کسان ٹریکٹر ٹرالیوں اور ٹرکوں کے ساتھ کھنوری و شمبھو بارڈر پر ڈیرا ڈالے ہوئے ہیں۔ پنجاب کے کسان سوامی ناتھن کمیشن کی سفارشات کو نافذ کرنے، کسانوں اور زرعی مزدوروں کے لیے پنشن، بجلی شرحوں میں کوئی اضافہ نہیں کرنے، پولیس میں درج معاملوں کو واپس لینے، 2021 کے لکھیم پور کھیری تشدد کے متاثرین کے لیے انصاف، اراضی حصول ایکٹ 2013 کو بحال کرنے اور 2020-21 کی تحریک کے دوران مارے گئے کسانوں کے کنبوں کو معاوضہ دینے کا بھی مطالبہ کر رہے ہیں۔